Sunday School hruaitute leh Mizoram Synod aiawh inkawm

khan India ram puma Sunday School khaitu ber, All India Sunday School Association (AISSA) office bearer-te leh Mizoram Synod hotute chu Zirtawpni khan an inkawm.
AISSA president Rochamliana kaihhruai inkawmnaah hian Mizoram Synod atangin Mizo Sunday School Union (MSSU) changtu executive secretary Rev VL Luaia Hranleh leh executive secretary Rev Dr K Lallawmzuala te an tel a, AISSA office bearer ho an tel bawk.
AISSA general secretary Rev Dr TI James chuan AISSA chungchang leh a hnathawh dan, hmalak tawhna leh hmalak mekna a sawi a. Mizoram Synod leh AISSA-in thawhhona tha tak an neih zui zel theih dan tur sawiho a ni.
AISSA hotute hian Synod senior executive secretary Rev C Zorammawia an hmu bawk a. National Council of Churches in India (NCCI) hotu hlui leh AISSA president leh general secretary lo ni tawh Rev K Lungmuana hoin an thukhawm bawk.
Vawiin, April 27 hian AISSA hruaitute hi thil pawimawh hrang hrang ngaihtuahin an thukhawm dawn a, AISSA OB-te hi India ram hmun hrang hrangah an thukhawm thin a ni.
AISSA hruaitute hi Inrinni zanah Khatla Presbyterian Kohhran biak inah an inkhawm anga, Pathianni chawhma inkhawmah Tuikhuahtlang Presbyterian Kohhran Sunday School leh Mission Veng Presbyterian Kohhran Sunday School an tlawh anga, chawhnuah Chanmari Presbyterian Kohhran biak inah, zanah Zarkawt Presbyterian Kohhran biak inah an inkhawm ang.
AISSA hi India rama Kristian pawl lian ber zing ami a ni a, NCCI uapna hnuaia awm niin, NCCI related agency a ni. NCCI-a tel kohhran leh Kristian pawl hrang hrang chu AISSA ah hian member an ni a, Nagpur-a NCCI campus-ah office neiin, India rama Sunday School rawngbawlna chungchang a hmalakna kawng hrang hrangah tih tur leh hmachhawp a nei thin a ni.