Sunday School Inkhawmpui nei
Mizoram Presbyterian Kohhran hnuaia Pastor bial hrang hrangah tun Pathianni, September 8 khan Naupang Sunday School Inkhawmpui neih a ni a. Inkhawmpui hi tunkar Pathianni ah pawh la neih tur a ni.
Naupang Sunday School Inkhawmpui hi bial tam zawkah chuan intihsiaka kalpui a ni a; bial thenkhatah erawh intihsiak loa hman a ni thung. Chawhma inkhawmah Beginner leh Primary department-ten Pathian thu, hla leh thu-inchhang hmangin an intihsiak a; intihsiaknana hmang lo bial thenkhat chu zirtirtute Inrinni zan inkhawm kal zat leh Pathiannia naupang kal tha tehin lawmman siam a ni.
Chawhnu inkhawmah Junior leh Intermediate bakah Sacrament department-te an intihsiakna a. Tunkar Pathianni hian Senior department-te an inkhawmpui ve thung ang.
Inkhawmpuiah hian naupangte atangin item hrang hrang, recitation, zai, lam leh thiam thil hrang hrang en leh ngaihthlak tur a awm bawk.
Naupang Inkhawmpui hi a tirah chuan missionary-te thahnemngaihnaa bul tan a ni a. Kum 1931 khan Aizawl Tlangnuam Kohhranah neih tan niin, hei hi Naupang Inkhawmpui hmasa ber nia hriat a ni. Tunhma chuan Naupang Inkhawmpui hi Pastor bial hrang hrangin an remchan hunah an nei thin a. Tunhnai atang khan bial tin an kalrual theihnan Mizo Sunday School Union (MSSU) chuan Sunday School Zirlai Syllabus-ah Naupang leh Senior Inkhawmpui hun tur an ruahman tel a ni.
MSSU hnuaiah hian, 2018 Synod Inkhawmpui report-a a lan danin, Sunday School hotu 4820, zirtirtu 53228, zirlai 411848, belhkhawmin 469532 an awm.