Sunday School khawmpui

September 10 (Pathianni) hi Naupang Sunday School Inkhawmpui Ni a ni a, Presbyterian Kohhran hnuaia bial hrang hrangah Naupang Inkhawmpui hi hman a ni ang.
Naupang Inkhawmpuiah hian Pathian thu, hla leh thu inchhang hmangin inel a nih dawn bakah naupangten item hrang hrang a remchan dan angin an nei ang. Naupang Inkhawmpui hi bial tam zawk chuan intihsiakna atan an hmang a, bial thenkhat erawh chuan intihsiak loin an hmang thung.
Naupang Inkhawmpui hi a tirah chuan missionary-te thahnemngaihna avanga neih tan a ni a. Kum 1931 khan Aizawl Tlangnuam Kohhranah neih a ni a, hei hi Naupang Inkhawmpui hmasa ber nia hriat a ni.
Tunhma chuan Naupang Inkhawmpui hi bial hrang hrangin an remchan hunah an nei thin a, tunhnai atang khan bial tinte an kalrual theih nan MSSU chuan Sunday School Zirlai syllabus-ah naupang leh senior inkhawmpui hun tur an ruahman tel a ni. September Pathianni vawi hnihnaah Beginner – Sacrament department leh Pathianni vawi thumnaah Senior department-in inkhawmpui an nei thin.
Kum 2022 Synod Inkhawmpui report-a a lan danin Sunday School 1028 a awm a; Beginner department atanga Sacrament department-ah zirlai 116424 leh zirtirtu 23854 an awm a ni.