Sunday School leh nitin school ah ruihhlo ti lo turin inzirtir ang – CYMA president

Sunday School leh nitin school
ah ruihhlo ti lo turin inzirtir ang
– CYMA president
Ruihhloin kan hnam a tih boral lohna turin Sunday School leh nitin school-ah ruihhlo ti lo tura inzirtir a tul tawh tih Central YMA president R Lalngheta chuan a sawi.
Ningania zana Aibawka YMA member thar lawmluh member infuihtharna leh kumpuan – “Ruihhlo Do” hawn a hmanpuinaah R Lalngheta chuan, ruihhlo chu tih chhin loh tur a ni, tiin, “kan tihchhin loh chuan kan addict lo mai,” a ti. Ruihhlo ngaiten suamhmang an tawk a, hengho hi kawngsir lehlama hel mai loin, tawngtaipui zawk tur an ni tih a sawi.
“Sunday School leh nitin school-ah pawh ruihhlo ti lo turin inzirtir ang u, chuti lo chuan ruihhlo hian kan hnam a tiboral hlauh ang tih a hlauhawm. Mut dawn tawngtaiah emaw vawikhat tal nitin kan tawngtainaah ruihhlo ngaite tan tawngtai thin ang u. Ruihhlo zuara inti hausate hi awt lo ang u, endawng ngam ang u, huaisen takin ruihlo hi do tlang ang u,” a ti.