Supply minister-in oil depot sawipui
Sairang Railway Station leh project pawimawh dang hawng tura Mizorama Prime minister Narendra Modi rawn kal tawiawmtute zing ami, sawrkar laipui Ministry of Petroleum & Natural Gas (MoPNG) leh Indian Oil Corporation Ltd (IOCL) hotute chu Food Civil Supply minister B Lalchhanzova’n a kawm.
Minister hian Prime minister-in Mualkhang-a IOC Limited hnuaia LPG Bottling Plant lungphum a phum chu lawmawm a tih thu a sawi a. MoPNG leh IOCL hotute chu hna tha taka thawh a nih theihnan theihtawp chhuah zel turin a chah. Mizorama oil depot liantham din a nih theihnana state sawrkarin hma nasa tak a lak dan sawiin, a bunna tur ram pawh Supply department-in ngawrh taka an zawnpui hnuah IOCL lam pawhin hmun hnih tinzawn deuh an nei tawh a, ram thlang fel thuai se a duh tih a sawi. Relin Sairang a lo luh takah phei chuan oil depot siam kawngah nasa taka awlsamna a thlen a beisei tih a sawi a ni.
Chief minister Pu Lalduhoma pawhin oil depot hlawhtlinna tur hian theihtawp a chhuahpui tih sawiin, Sairang rel kawng hawnga Prime minister lokal chu hemi lama hma laksak tura ngenna lehkha chief minister-in a lo pe tih a sawi bawk.
MoPNG director Kushagra Mittal chuan Mizorama oil depot din chungchangah minister ngenna chu theihtawpa bawhzui pui a tiam tih a sawi a ni.