Surat Session Court chuan April 20 khan Congress leader Rahul Gandhi an criminal defamation case a thiamloh chantira kum hnih lung in tang tura a tihna stay tura a ngenna chu a hnawl sak.
April 3 khan Surat session court chuan Rahul Gandhi chu kum 2019-a Modi surname chungchang a sawi avanga BJP legislator in defamation case a siamsaka thiamloh a chantir hnuah bail a pe zui a.
Hei bakah hian court chuan Rahul Gandhi-an appeal a siam hma chuan amah hremna chu kalpui rih lo turin a ti bawk a.
Rahul Gandhi chuan application, pakhatna chu amah hremna tihkhawtlai a dilna leh pahnihna amah hremna chu hnawl rih tura ngenna a thehlut a ni.
Surat court-in thutlukna siam hnuah Congress general secretary Jairam Ramesh chuan, “Dan hnuaiah hmalak theih dan kawng kan la dap zel ang,” tiin a sawi a.
Congress leader Rahul Gandhi chu March 23 khan thiamloh chantir niin hei vang hian March 24 ah Lok Sabha member atanga disqualified zui nghal a ni bawk.
Dan lama mithiamte chuan amah hremna court-in a stay a nih chuan lok Sabha member a nihna chu pekkir leh mai tur tiin an sawi a.
Court of additional district judge R.P. Mogera chuan complainant Purnesh Modi hnenah pawh notice pe zuiin, Purnesh Modi hian Rahul Gandhi an kum 2019 Lok Sabha inthlan dawna Karnataka a rally a neihnaah “eng vangin nge rukru tin te hian Modi surname an neih vek” tia a sawi chu huain a khing zui ta kha a ni.
-- Advertisement --
Ngaihdam dilna hun tha la nei ti
Hetih lai hian Union Information and Broadcasting Minister Anurag Thakur chuan Gujarat court in Rahul Gandhi dilna a hnawl hnuah Rahul chuan ngahdam dilna siam turin hun tha a la nei tiin a sawi thung a.
“Surat Court-in Rahul Gandhi ngenna a hnawl hian Congress dynast tena India rama OBC community te an hmuhsitna leh PM Narendra Modi hmusita an beihna nasatzia a pholang a ni” tiin Thakur chuan a sawi a.
“Rahul Gandhi hian ram mipui hriatah ngaihdam dil turin hun tha ala nei,” tiin Thakur, Lok Sabha a tum thum lai thlantlin tawh chuan a sawi.