Swiatek leh Alcaraz champion

Swiatek leh Alcaraz champion
Pathianni khan Iga Swiatek leh Carlos Alcaraz-te chuan straight sets hnehna ve ve nen an title kawl lai an humhim.
Polish world number one Swiatek hian Stutt-gart khaw tournament lian final-ah 6-3 6-4-in nikum final-a a hneh hnu world number two Aryna Sabalenka of Belarus bawk kha beidawngin a hawtir leh.
2022 US Open-a a Grand Slam title hmasa-ber vawchhuak Alcaraz chuan an ram khawpui lian Barcelona final-ah Stefanos Tsitsipas of Greece chu 6-3 6-4-in a sawp a, a title a hum-himna kawngah Spaniard hian tournament khelh chhungin set khat mah a hloh lo.
Spanish rawlthar kum 19 mi Alcaraz tan tun kha season kal laia title pathum a lakna ni der tawhin, Barcelona hma hian Buenos Aires leh Indian Wells lamah a lo champion tawh a ni.
Grand Slam-a vawithum champion tawh Swiatek leh Alcaraz-te hi tunhnai chawlhkar engngemawti chhung khan hliamin a tibuai ve ve a, an hliam thawhsanin an khelh that thin dan pangngai (form) an luah leh nghal thei ve ve a, thla thara Roland Garros lama khelh tawh mai tur French Open lamah pawh rinkai ni chho leh tawhin, Pole phei hi chu hmeichhe singles lamah defending champion a ni nghe nghe.
Swiatek hi a nakruh a tihnat hnua tournament a khelh leh vawikhatna ni nghe nghein, a hliam avang khan Billie Jean King Cup qualifiers leh Miami Open lamah a inlan theih loh phah a; kum 2015 leh 2016 champion Angelique Kerber hnu lama Stuttgart title la zawn leh thei hmasaber a ni.
Belarusian Sabalenka erawh Germany ramah hian a vanduaina a kaltluang rei ta viau a, tun kha final hnuhnung pathuma a vawithum tlawmna a ni!
Pathianni final kha 2013 French Open final daih tawha Serena Williams laka Maria Sharapova tlawm hnu lam clay final-a women’s world number one leh number two inhma-chhawn leh vawikhatna a ni.
Alcaraz kha kut leh hnungzang lama harsatna tawk zo hlim niin, a hliam avangin Monte Carlo Masters-ah pawh khan a inlan theih loh phah a; Barcelona Open-ah khel bawr hliam avanga kumin January thla atanga inelna la hmachhawn leh thei ta lo 14-time French Open champion Rafael Nadal leh kiu hliam avanga bawksawp mek world number one Novak Djokovic an inlan theih loh laiin a dam a, a champion a, May ni 28 atanga khelh tan tur Paris tournament lian atan pawh rinkai a ni nghal.
Barcelona khaw men’s doubles final-ah Great Britain mi Neal Skupski leh a Dutch kawppui Wesley Koolhof-te chu Argentine pair Maximo Gonzalez leh Andres Molteni lakah an tlawm.
Gonzalez leh Molteni tangdun hian 4-6 7-6 (10-8) 10-4 hnehna nen kumin chhunga an title pathumna an hlawhchhuak a, Bar-celona khua an pan hma hian Cordoba leh Rio de Janeiro lamah an lo champion tawh bawk a ni.
Munich khawpuia BMW Open-ah Denmark player Holger Rune chuan ‘comeback’ pui tak lantirin final set hmuhnawm tak an khelh hnuah Dutchman Botic van de Zandschulp hnehin a BMW Open title kawl lai a humhim.
ATP Tour title pali a lak ve tawh zinga pahnih hi Munich khaw tourna-ment-a a sualchhuah hi a ni nghe nghe.
Germany ram tournament final-ah tunhnaia ban na avanga talbuai ve zawk Rune hi a chetha nghal buan buan lo a, a tawpah 2022 final-a a hneh tawh lakah 6-4 1-6 7-6 (7-3) hnehna chang lehin, rawlthar kum 19 mi hian ATP title pali a la tling ve ta a ni.
Bosnia-Herzegovina ram lamah Dusan Lajovic chuan 6-3 4-6 6-4 -a world number six Andrey Rublev hnehin Srpska Open title a chang ve bawk.
Serb world number 70 Lajovic hian quarter-final lamah pawh Novak Djokovic hneh tawhin, a career-a a title pahnihna a hmin.
Kum 32 mi Lajovic hian kum 2019 khan Croatia Open-ah a title hmasaber a lo sualchhuak ve tawh a ni.