Northeast India danglam nasa zual dawn

India northeastern States (Arunachal Pradesh, Assam, Manipur, Meghalaya, Mizoram, Nagaland, Tripura leh Sikkim) te chuan inthlak danglamna nasa tak a tawng mek a.
Security lama tun hmaa harsatna namen lo a tawh thin kha a paltlang tawh tih theih niin tunah chuan economic development lam a hawi nasa hle.
Chu mi tur chuan politics lama inthlak danglamna a pawimawh a, chutihrual chuan a thenawm Bangladesh nena inthlunzawmna chu pawimawh hlea ngaih niin, Northeast hmasawnna atan mai bakah India leh Bangladesh hmasawnna atana pawimawh tak chu Japan a ni ta daih thung.
India-Japan Intellectual Dialogue (April 11–12, 2023) tum thumna chu Agartala, Tripura-ah Asian Confluence (ASCON) huaihawta neih a lo ni tawh a. Tun kum sawm vel lo awm turah northeast-ah thil inthlak danglam nasa tak a thleng niin Bangladesh, India leh Japan te chuan thawhhona nasa tak an kalpui mek a ni.
Chuta tana pawimawh ber pakhat chu Bangladesh-a southeastern coast a Matarbari Deep Sea Port (DSP) siam that mek chu a ni a. Japan tanpuina sum hmanga thawh mek niin kum 2027-ah hman tan theih tura tih a ni a. ASCON te chuan ‘game changer’ tur tiin an sawi a. He lawngchawlhna hian Bangladesh leh India northeast mamawh a phuhru dawn tia sawi a ni. Hun reiah chuan he lawnghcawlhna hi Bangladesh leh northeast tan hub leh industrial corridor ni dawnin mipui maktaduai 220 velin an hman tangkai viau rin a ni.
India-a Japan ambassador Hiroshi Suzuki chuan conference neihnaah roads leh railways connectivity tihpun chuan pawimawhna a neih rualin regional industrial value chains siam a ngai tiin a sawi a. Northeast-in industry lama hmasawnna a neih theih nana pawimawh niin tuna ruahmannate hmangin connectivity chu a nihna tur anga hman a ni thei chauh ang tih a ni bawk a. Kawngpui leh lawngchawlhna tha chuan hna tautet siamin chu chu industrial enterprise national leh foreign investment hmanga neih theih chauh a ni a. Chumi a thlen theihna tur chuan connectivity tihchak leh Bangladesh leh northeast a industry tihchangtlun chu tihmakmawha ngaih a ni.
Northeast chu natural resource pawimawh nei tha a ni a. A awmna hmunin a zir bawk a, Nepal, Bhutan, China, Bangladesh leh Myanmar te nena inrina nei a nih avangin a pawimawh em em a. Value chains leh manufacturing product siam tur te chu agro-processing, man-made fibres, handicrats te mai bakah two-wheeler assembly te, mobile phones leh pharmaceuticals te thlengin a la ni tura ngaih a ni a. Northeast a cheng te chuan education an neih that avangin services sector lamah an tha a, chu chuan investor te a hip phah dawn tih a ni bawk.
Japan chu northeast-a investment ti nasa ber niin Indian company te pawhin investment nasa zawka an tih a ngai tia sawi a ni a. India chuan Bangladesh atanga investment a luha remtih a ngai a, ram pathum (India, Bangladesh, Japan) te chuan economic cooperation inthlunzawmna lamah nghet zawka thawhho an mamawh tih a ni bawk.
Tun hnaiah Bangladesh Minister fo State for Foreign Affairs Shahriai Alam chuan Dhaka leh New Delhi te chuan 1965 hmaa India leh Bangladesh te inzawmna dinhmun an thlen lek lek tawh thu a sawi a. Alam chuan Bangladesh chuan connectivity lamah hma a lak nasat thu sawiin India chuan a zawm ve a ngai a ti a. India-in Act East Policy tihhlawhtlin tak tak a duh chuan Bangladesh a puih a ngai a ti bawk.
Hei vang tak hian duhthusam lo tak tia sawi Bay of Bengal Initiative for Multi-Sectoral Technical and Economic Cooperation (BIMSTEC) chu hnawlin Bay of Bengal Community (BOBC) tia bultan that leh zawka hmalakna nasa zawk kalpui ni se an duh bawk a.
Hei bakah hian South Asia leh Southeast Asia thlunzawm tak tak tur chuan hmalakna nasa zawk a ngai ti bawkin chumi tur chuan Bangladesh, India leh Japan (BIJ) forum mumal zawka kalpuiin BIJ forum chu Foreign Minister level a kalpui ni se chu chu northeast India tan chuan tha ber tura ngaih a ni bawk tih a ni.