Synod moderator tharin mawhphurhna la

Synod moderator tharin mawhphurhna la
Synod Inkhawmpui neih mekah Nilaini khan moderator tang lai Rev RC Lalnghakliana chuan Rev John Raldosanga hnenah moderator mawhphurhna a hlan.
December 9 atanga Zarkawt Presbyterian Kohhran biak ina Synod Inkhawmpui vawi 102-na neih tanah, December 10 chawhma inkhawmah moderator tang lai hian moderator thar tur hnenah mawhphurhna a hlan a. Palai lawmna, Synod pawn palai lawmna leh inkhawmpui chibai bukna hman a ni bawk.
Nomination thu ngaihthlak a ni a, kum 2026 Synod Inkhawmpui programme leh puipa turte pawm niin, puipa tur chu:
moderator – Rev R Lalrinsanga, MSK; secretary (Sr.) – Rev B Zohmangaiha, MTC; secretary (Jr.) – Upa C Lalduhawma, Synod Office;
finance officers – Rev Dr K Lallawmzuala leh Rev Vanlalzuata; statistician – Rev Lalsangmuana, Bethlehem; senior executive secretary – Rev VL Luaia Hranleh; executive secretary – Rev Dr Rosiamliana Tochhawng an ni.
Kum 2026, 2027 leh 2028 inkhawmpui thlengtu tur chu inkhawmpui hmasa lamah tihfel a lo ni tawh a. (2026 – Chanmari Pastor bialin Chanmari Kohhran biak inah, 2027 – Ramhlun North Pastor bialin Ramhlun North Kohhran biak inah, 2028 – Republic Veng Pastor bialin College Veng Kohhran biak inah). Kum 2029 Synod Inkhawmpui chu Electric Veng Pastor bialin Electric Veng Kohhran biak inah an thleng dawn a ni.
Kum 2026-a Pastoral ministry thupui atan “Thlarau leh tih takzeta Pathian biak” (Johana 4:24) pawm a ni a, pro. pastor 15 lak tura pawm a ni.
Pastor bial thar 7 hawn tura pawm a ni a. Pastoral hnuaiah Salem Veng bial, Falkland bial, Champhai Zotlang bial leh Dolchhora bial, Synod Mission Board hnuaiah Koreng bial, Ranchi bial, Masihi Sangati Serchhip Pastor bial an ni. Presbytery hawn thar tur a awm lo.
Minister, pastor leh pro. pastor-te awmna tura Pastoral-in ruahmanna a siam chu inkhawmpui hian a pawm a. Sipai pastor-a lut an awm theihnan Synod-in a buaipuitu tur ruat tha tih a ni a, SEC hmalak turin dah a ni.