System leh a kengkawhtu mihring

Daktawr (MBBS/BDS) luhna tura exam lian ber NEET exam zawhna chingpen chungchangah, Union Education Minister bang tura Cockroach Janta Party nawrna avangin Education Minister chuan banna a theh lut a, CJP thil phut dang pawh sawrkarin a pawmsak vek bawk a. Democracy chakna/thiltihtheihna a lang a, a lawmawm e.
NEET exam paper tichingpentu mi 13 te pawh man chhuah an ni a, an chungthu hi Fast-Track Court-in a ngaihtuah a. Tunah hian OMR (Optical Mark Recognition) sheet dik lo awm anga NEET exam buatsaihtu (NTA) puhna chinfel tur a la awm mek bawk.
Heng thil dik lo tak a thlen theih chhan hi system dik loh lutuk vang pawh ni em em chuang lovin, system dik leh fel tak tichingpen duhtu (mihring) an awm vang zawkah a puh theih awm e.
Dik lo taka thiltih a thlen theihna chhan hi system fel loh vang emaw, system fel tak pawh tichingpen duh mihring an awm tlat vang emaw a ni mai a. Eng anga felfai leh khirhkhan system tha tak pawh duang ila, chumi tichingpen talh duh an awm miau chuan indan a har hle dawn tihna a ni.
Chuti ni se, system nge pawimawh zawk system enkawltu mihring? tih zawhna a awm thei ang a. An pahnih hian an pawimawh ve ve a, ‘zawk’ a awm thei awm lo ve. System fel lo tak hnuaiah pawh mi rinawm tak chuan fel tak leh dik takin a ti/thawk mai a, mi rinawm lo chuan system fel fai tak pawh tihchingpen dan a zawn talh chuan system khan awmzia a nei tak tak chuang lo tihna a ni.
Chuti ni se, Mizoram bikah hian lo kai lut ta ila. Sawrkar inrelbawlna thilah hian, dik lo taka thiltihna pumpelh theihna turin file kal dan system kikawi chipchiar leh kalkawng thui deuh mai siam a ni a, file pakhatin dawhkan tam tak a paltlang a ngai thin. Hetiang khawpa system tha hnuaiah pawh hian, ‘eirukna a hluar’ tiin NGO hrang hrang, kohhran hrang hrang ten eirukna duhlohna kawngzawh te, tawngtai rual te an huaihawt mup mup reng mai si a. A chang chuan eirukna tam tak hi chu mipuiin an nawr thin vanga thleng anga ngaih theihin sawi a ni thin bawk.
Mipui lamin dik lo taka thil ti tura an nawr chung pawha lo duh lo a, lo dang tlat tur chu sawrkar hnathawk leh roreltute hi an ni zawk a, chutianga rinawm taka thawk tura mipuiin hlawh neia an rawih leh thlan chhuah te an ni.
Eng pawh ni se, system fel tak neih hi chu kan tihtur hmasa chu a ni a; system bawhchhetute hremna dan hi han khauh viau phawt mai se, chu chuan min vawng tha deuh mahna!