Taliban ten hmeichhiate rap bet zui zel

Afghanistan-a rorel lai Taliban te chuan hmeichhiate rahbehna tipung zelin hair leh beauty salon tinte khar turin thupek a chhuah.
Vice and Virtue Ministry chuan heng beauty salon te hi 2 July atangin thla khat chhung an dawr te khar tura hun pek an ni tiin a sawi a.
Kum 2021-a Taliban tena thuneihna an chan hnuah hmeichiate zalenna chhuhsak leh laksakin an awm zui ta char char a.
Hmeichhe tleirawlte chu classroom, gym leh park-ah te an kal ve phalsak loh niin United Nations a hnathawh takngial pawh an remti lova.
Hei bakah hian Taliban-te chuan hmeichhiate chu an mit chauh tilanga inchei tura ti bawkin 72km aia thui an kal/zin dawn a nih chuan an chhung mipa ten an hruai ngei a ngai bawk.
Khawvel ram hrang hrang ten demna nasa taka an auchhuahpui chung leh women activists tena an sawisel chungin Taliban te chu an phu eih chuang lo.
Kum 1996 leh 2001 inkara thuneihna an chan lai pawh khan Taliban te chuan beauty salon te an lo khar tawh bawk a. Mahse, kum 2001-a US-in Afghanistan a run hnuah heng beauty salon te hi hawnin a awm leh a ni.
“Taliban-te hian Afghan hmeichhiate basic human rights a chhuhsak a ni. Women’s right an bawhchhia mai a ni lo va, Tuna an thutlukna hmangin hmeichhiain a hmeichhiatpui a tanpui an remti lo tihna a ni,” tiin Afghan hmeichhe pakhat chuan a sawi a, “Taliban-te hian hmeichhe taksa thlurbing tih loh chu political plan dang an nei pawhin a lang lo. Public life atanga hmeichhiate nawr chhuah an tum bur a ni ber,” tiin a sawi bawk.
US sipaite inhnuhdawh hnu kum hnih kaltaa Taliban tena thuneihna an chan hnuah pawh beauty salon-te hi an khar mai lo thung a. Mahse, heng dawr pawna hmeichhe thlalak intar te chu spray hmangin an hmaite tihchhiatsakin an awm thung.