AMC Multi Complex hawng

Aizawl Municipal Corporation (AMC) in cheng vaibelchhe 10.59 senga a sak AMC Multi Complex Tuikual South ami chu Nilaini khan Aizawl mayor Lalrinenga Sailo chuan a hawng.
Mayor chuan kum 2015-a corporation-a AMC hlankai a nih hnuah chak takin assets siam tura hma lak a nih thu a sawi a. Hotu hmasate hmalakna a chhuanawm tih a sawi. AMC chu mahnia inchawm thei tura tih a nih avangin sawrkar laipui atanga a sum dawn a tlem telh telh a, sum (revenue) lut thei thil rotling (asset) siam tumin theihtawp chhuah zel a tul tih a sawi a ni.
AMC Multi Complex hi contractor-in tha taka a sak thu a sawi a. A enkawl chhunzawm kawngah AMC bakah a awmna Tuikual South mipui an pawimawh dawn tih a sawi a ni.
He Multi Complex hi mi tamtak tan malsawmna thlentu, eizawnna tamtak siam tura ruahman a ni tih Lalrinenga Sailo hian a sawi a. Lirthei dahna hmun, chawhmeh bazar leh dawr dang a awm dawn a, building chung bera Hall siam chu a hmang duh apiangin man chawia an hman theih tur a ni tih a sawi. Bazar hmun tura ruahmanah hian Mizoram Assembly House bul kawngsira inpho thinte nuam zawka an thut theihna tura ruahman a nih thu a sawi bawk.
Tuikual South huamchhunga AMC Multi Complex sak hi Property Tax tlingkhawm leh AMC fund dang bakah AMRUT fund hmanga phase tamtaka sak a ni a. ‘UT building’ tia sawi thin, a building a hlui tawh avanga luah ngam tawh loh chu AMC-in Mizoram sawrkar GAD dilin, phalna a neih hnuah thiatin AMRUT fund nuai 296 hmanga parking lot sak tan a ni a; AMC fund hmanga chhunzawm a ni. 2017 August 18-a sak tan niin, kumin March 13 khan zawhfel a ni a, chhawng 7 a ni.