Defence ministry chuan Ningani khan Rs. vaibelchhe 2,500 man tur tank beihna hmanrua, Nag missile system (NAMIS) leh lirthei zangkhai chi, sipaite tichakna tur leina turin inremna a siam.
NAMIS leina tur hian Armoured Vehicle Nigam Limited (AVNL) nen Rs. vaibelchhe 1,801-in inemna an siam a. Sipaite hian kum thum vel kal ta khan Nag missile phurtu 13 leh missile 293 lo lei tawhin hei hi an tha tichaktu a ni a. NAMIS hi Defence Research & Development Organisation (DRDO)-in an duan a ni.
Ministry hian Force Motors Ltd leh Mahindra & Mahindra Ltd nen sipaite hman tur lirthei 5,000 vel leina turin inremna an siam bawk.
Defence ministry chuan, “NAMIS leina tur tihfel hi Indian Army-in beihpui an thlakna kawnga inring renga an awma tank lo beih letna tur an neihna tur leh an hmanrua tichangtlunna tur pawimawh, mellung thar a ni,” tiin thu an chhuah.
NAMIS hi tun laia tank beih letna hmanraw tha niin a kah a nain a kap dik em em niin an sawi bawk.
Inremna hi Buy (Indian-IDDM) category hnuaia ziah a ni a. Indian-IDDM category hi India-in ama siam chhuah ngei hmanrua a hman theihna tura category pawimawh ber pakhat a ni a. A lampui pawh indigenously designed, developed & manufactured tih a ni.
Lirthei zangkhai lei tur pawh hi sipaiten hmun khawkrawk tak takah pawh an chetpui thei tur leh hmalakna tiawlsam thei tur a nih thu ministry chuan a sawi.
“Heng inremna pahnih hi ram chhunga siam chhuah ngei hmanna tur thil niin ramin ram venhimna hmanrua siamnaa a theihna pho lanna a ni a. He thil hian MSME sector hrang hrang, heng hmanruaa bung pawimawh siamtuteah hna pawh a siam nghal thei dawn bawk a ni,” an ti.
Defence ministry hian a hma ni chiah khan Rs. vaibelchhe 6,900 hu Bharat Forge Limited leh Tata Advanced Systems Limited (TASL) nen Indian Army ralthuam neih tichak turin inremna an siam tawh a. Hei hi tual chhung siam laipui 307 leina tur leh a hnuktur tur lirthei leina tur a ni.
India hi tun hnaiah a ram chhunga siam ngei ralthuamah a innghat nasa hle tawh a. Ralthuam chi hrang hrang chu ram dang atanga lak luh duh tawh lovin tualchher a hmang nasa a, hei hian foreign direct investment (FDI) pawh 49% atangin 74%-ah a tisang a, sumdawnnah hma a tisawn bawk.
February 1-ah budget pharh takah khan ram venhimna atana hman turin Rs. vaibelchhe nuai 6.81 dah a ni a, heng zinga Rs. vaibelchhe nuai 1.8 chu sipai tichangkanna tur a ni a. Sipai tihchangkanna tura sum dan 75% hi India siam ngei hmanrua leh ralthuam leina tura tih a ni bawk.
Tank beihna leina tur Rs. vbc 2,500 inremna ziak
Get real time updates directly on you device, subscribe now.