Nu in a theih anga tam inchhung a luahlum tur – Laldawngliana

On Mar 29, 2025 59 0

Nu in a theih anga tam
inchhung a luahlum tur
– Laldawngliana
Chhungkaw nu berin inchhung a luahlum loh chuan a dinhmun a hai tihna a ni a, theih anga tamin nu in in a luahlum tur a ni tih MLA K Laldawngliana chuan a sawi.
Zirtawpnia MHIP Kawnpui Block Conference neih a hmanpuinaah Tuirial bialtu MLA K Laldawngliana chuan, hming lam nuam leh lam zin ber pawlah ‘Ka nu’ tih hi a tel ve phak a rinawm tih sawiin, nu awmna inchhungah chuan ‘ka nu’ tih chu a thunawn ang maia ri deuh reng a ni tih a sawi.
“Naupang phei chuan ka nu tih hi an hming lam tam ber a ni. Naupang chauh an ni lo, kan puitlin hnuah pawh nu hming hi kan lam ri reng a. Inchhung tinuama uap lumtu chu nu ho, MHIP member-te an ni,” a ti.
Pa in chhungkua a din a, nu in a luahlum a, nu chu inchhung missionary a ni a. Nu tel lo chuan chhungkua kan luah lum zo lo a ni ber tih MLA hian a sawi a. “Nu in in a luahlum loh chuan a dinhmun a hai a ni. Theih anga tam nu in in a luahlum tur a ni,” a ti.
Bible thupekah nupuite chu mahni pasalte thuhnuaia intulut tura beisei an ni a, pasal chu a nupui hmangaiha a laka vin lo tura thu pek a ni tih sawiin, “Nu tha, Pathian tih mi chuan an pasalte hnena intukluh hlut zia hi an man chiang. Pasalte hnehna thuruk chu ‘intukluh’ a ni a, tihtauh khum a ni lo. Pasalte lak ropuina chu pasalte zahthiam a ni,” a ti.