Tanpui ngai naupangte puih dan inhrilh

Kolasibah Women & Child Development Department hnuaia sawrkar laipui atanga naupang tanpui ngaite tanpuina pek chungchanga hriat tur inzirtirna, ‘Sensitization Programme for Sponsorship & Foster Care Beneficiaries’ buatsaih a ni a. District bawrhsap John LT Sanga’n a telpui a, tanpuina dawng tur thlan chhuah naupangte leh an nu leh pate an tel bawk.
Sponsorship & Foster care atana sum lokal hi Juvennile Justice Care & Protection Act 2005 hnuai atanga lokal a ni a. Naupang kum 18 hnuailam, a duh apiangin an dil thei a, dilna lut atangin tanpuina dawng awm naupang chu an inah kalchilha zirchian an nih hnu ah District Level Selection Committee-in a dawng turte chu kum khat atan an thlang chhuak thin.
Heng an thlan chhuahte hian thlatin Rs. 4000 dawngin, naupangin zirna school an kal theihna atan, hriselna enkawlna’n leh eitur tha leina atan hman tur a ni a. An hman dan felfai taka chhinchhiahna chu an thehlut leh thin tur a ni.
Kuminah hian Kolasib district-a naupang chhawmdawl ngai mi 119 hnenah he sum hi thla 6 atan pek tawh a ni.