Taxation department-in chhiah luh that lawm

Taxation department-in chhiah luh that lawm
Mizoram Taxation department chuan kum 2022- 2023 chhunga sawrkarin target a bituk an khum chu Zirtawpni khan an lawm a. Chief minister Zoramthanga leh Taxation minister Lalchamliana ten an hmanpui.
Taxation department hi Mizoram sawrkar tana revenue chhungluttu lian ber a ni a. He department hian Goods & Service Tax, Value Added Tax leh professional tax atangin chhiah a la a. 2022- 2023 sawrkar kum chhunga chhiah lut zawng zawng hi cheng vaibelchhe 1020.66 a ni. Revised estimate-ah vbch. 900 hmu tura beisei an nih laiin, RE target hi vbch. 120.62 in a khum. State-in ama puala chhiah a lak ve, State’s Own Tax Revenue (SOTR) target vbch. 917.79 pawh vbch. 102.87 in a khum a ni.
SOTR bakah Taxation department hian central atanga thla tina Devolution of Taxes and Duties Mizoramin a hmuhah hian contribution sang tak a nei a. GST hman a nih hnu hian tax revenue hi Central GST leh State GST ah inzahsem a ni. Taxation department hnuaia GST registration neite hian chhiah an pekin CGST leh SGST hi 50-50 basis in an pe a. SGST bik hi Mizoram sawrkar sum bawmah a lut nghal a ni. CGST erawh sawrkar laipui sum bawmah central taxes leh duties dang nen a lutkhawm a, heta tang hian tax devolution hi Mizoram sawrkarin a lo hmu let ve leh thin a ni.
Chief minister chuan hun pangngai – normal period chu nise, budget system ang chuan state-in hmasawnna hna awlsam taka thawh theih a nih laiin, hrileng avangin budget pawh a lo innghah tawhna, state sum hmuh hrek a ni ta a. Sum hnar dang bakah sum hmuhna innghahna lian ber, share of taxes chu a tlakhniam tak avangin leh chu sum kan hloh chu tun thlenga rulhna hmuh let a awm loh avangin hrileng boruak a ziaawm hnu ah pawh sum harsatna hi a la inzui zel tih a sawi a ni.
Hmasawnna hna thawhna atan chuan sawrkar laipuiin development fund tam tak a kawl, project hmanga haichhuah tur neih a pawimawh tia sawiin, “Chu’ng fund sanction chu state-in a lo dolet ve na tur chu state sum a awm a, a zuk thalchhuah lamah tan lak a pawimawh. Tax atanga sum lakluh pawh hma lak zel a pawimawh a, tunah resource mobilization kawngah hma lak a ni mek bawk,” a ti.
Taxation minister Lalchamliana chuan department thawktute theihtawp an chhuah thin avanga lawmthu a sawi rualin, contractor-te GST pe lo an awm tih thu report awm chu tan lak ngaihna a ni tih a sawi. GST a register awm, in-register lo sawi tur an awm thinte chu awareness lama hma lak a tulna tilangtu a ni, tiin, “Mipuiin kan mawhphurhna kan hriat tel ve a tul a ni,” a ti.
Taxation principal secretary Vanlal Chhuanga chuan, state-in revenue deficit grant a dawn thin chu kum tin 15th Finance Commission chuan a tihhniam zel a, hei hi sawrkar laipuiin state-te sum thawkchhuak tam ve tura a duh vang a ni, tiin, revenue receipt atan taxation tluka kan innghahna lian a awmlo tih a sawi a ni.