P&E-in cheng vbch. 137-in revenue target an khum

P&E-in cheng vbch. 137-in
revenue target an khum
Power & Electricity department chuan sum thawkchhuak tura tuk sak an nih zat aia vaibelchhe 137-a tam an thawkchhuak.
Mizoram Finance department chuan 2022- 2023 sawrkar kum chhunga sum thawkchhuak tura P&E department a tuk, revenue target chu vaibelchhe 600 a ni a, department hian hemi hun chhung hian eng chhit man leh thildang atangin revenue target hi khumin cheng vbch. 737 a thawkchhuak a, hei hi za zelah 122-in an khum a. Chutih laiin Joint Electricity Regulatory Commission (JERC) in hemi hun chhung veka revenue target thawkchhuak tura a beisei chu cheng vbch. 403 a ni thung.
Kum 2022- 2023 chhunga P&E Sub-Division inelna an buatsaih zingah sum chhunluh lamah thawk tha thlan a ni a, chhunglut tam ber chu Revenue Sub Division II Aizawl niin, cheng vbch. 157.77 a thawkchhuak. Pahniha leh pathumna chu Mamit Power Sub Division leh Champhai Power Sub Division an ni. Hmanrua leh thildang avanga sub station atanga consumer-te hnena kawlpetha a thlen thlenga hlohna hrang hrang, Technical & Commercial Loss (AT&C Loss) tihtlem kawnga thawk tha ber chu Champhai Rural Sub Division niin, an AT&C loss hi za zelah 7.46 a ni a; pahnihna leh pathumna chu Mualthuam PSD leh Mamit PSD an ni.
Transformer venhimna lamah Division nga – Distribution Division I Aizawl South, Distribution Division III Aizawl Central, Revenue Division I Aizawl North, Tuipang V Power Sub Division leh Maicham Hydel Project Sub Division North Vanlaiphai te chuan kum 2022- 2023 chhungin transformer pakhatmah an tichhe loa, pahihna leh pathumna chu Kolasib PSD leh Bungtlang South Power Division an ni.
Power & Electricity department chuan Zirtawpni khan Electrical Safety Week an hmang a. He hun hmanpuitu P&E minister R. Lalzirliana chuan electric current kaihhnawihah mawhphurtu an nih angin, a pek chhuahna lam bak inven fimkhurna lamah pawh thawktu zawng zawngten tih takzeta hun leh tha leh rilru an sen a tul tih a sawi. Indian Electricity Rules leh, rules & guidelines dangte chu a hrechiang bertu an nih angin tun aia uar zawka heng dan leh hrai hi puanzar a tul tih a sawi bawk.
Kumtina electric current kalsual avangtea in leh lo chan an awm thin chu a pawi tih thu sawiin,”Hemi kawngah hian awareness kan mamawh takzet. Thil pawi thleng palh thei nia kan hriat reng reng chu, pawi a thlen hmaa action kan lak thuai a a ni,” R Lalzirliana hian a ti a. A department huamchhungah pawh inenfiah a, fimkhurna leh himna chungchang inzirtir uar a tul tih a sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More