Taylor Swift a lar ber

Taylor Swift chu kar khat chhunga US-a zaithiam lar ber niin, Billboard Artist 100 chart-ah a No.1 a, he chart-a a No.1 tawh zawng zawng belhkhawm chu kar 81 a tling tawh a, Artist 100 chart-a No.1 ni ngun ber a nihna a sawh nghet leh ta sauh a ni. Hetihrual hian Ed Sheeran pawh top 5-ah a rawn lang thar ve leh ta bawk.
Billboard Artist 100 chart hi kar khat chhunga US-a zaithiam lar dan tehna niin, chart ranking siam nan hian kar khat chhunga album leh hla mal hralh tam dan te, streaming leh radio airplay te chu tehna pawimawh a ni.
Taylor Swift hian a album leh hla hralh that zar a la zo a, a album thar ber ‘Midnights’ chu 43,000 hralh lehin Billboard 200 (albums) chart-ah No.8 a la ni a, a album dang pariat chu Billboars 200 chart-ah a lang bawk. Hei bakah hian hla mal hralh lamah pawh a la che tha hle a, ‘Cruel Summer’ chu Billboard Hot 100 (singles) chart-ah No.3 a la ni a, ‘Anti-Hero’ chu No.20 niin, ‘Karma’ featuring Ice Spice chu No.31 a la ni bawk a, hei hian Artist 100 chart-ah pawh a la vawrh sang ta zel a ni.
Morgan Wallen chu No.4 atangin No.2-ah a insawn a, ani pawhin a album ‘One Thing at a Time’ hralh that zar a zo a, he album hi 75,000 hralh lehin Billboard 200 chart-ah No.1 a kai thar leh a, a zawn ni kher lovin he chart-ah hian kar 16 a No.1 pui tling tawh.
Ed Sheeran pawhin a album thar hralh that zar zoin, No.17 atangin No.3-ah a invawrh a, a album thar ‘Autumn Variations’ chu 62,000 hralhin Billboard 200 chart-ah No.4 a kai pui a, he album-a a hla Hot 100 chart-a a lang a nei nual bawk.
Olivia Rodrigo chu No.2 atangin No.4-ah a tawlh a, Zach Bryan chu No.3 atangin No.5-ah a tawlh ta bawk.

Billboard Artist 100 Top 10:
1 Taylor Swift
2 Morgan Wallen
3 Ed Sheeran
4 Olivia Rodrigo
5 Zach Bryan
6 SZA
7 Rod Wave
8 Drake
9 Luke Combs
10 Miley Cyrus