Taylor Swift-i’n mi 75,000 tan eitur pe

Taylor Swift-i’n mi 75,000 tan eitur pe
Taylor Swift chuan a US Eras Tour khar tura a inpuahchah mek laiin Second harvest Food Bank – Feeding South Louisiana hnena mi 75,000 tana chaw eitur a thawh thu an puang leh ta. He tlawmngai pawl hian thuchhuah siamin, “Ngilneihna a chet chhuah chuan, thil mak a thleng thin. Vawiin hian @TaylorSwift hnen atangin South Louisiana a chhungkaw eitur nei lo te tan mi 75,000 daih chaw eitur kan dawng a, eitur tlachham te an puar theih nana kan hmalakna a chaklehzual dawn e,” an ti. Swift hian kar liamta mai khan New Orleans-a Caesars Superdome-ah zan thum show nei zo hlim deuh hlawl a ni a, an thuchhuahah chuan, “Hetianga midangte tana inphala, midang ngaihsak tak tak nei te nena thawhho hian danglamna a thlen thei tih min hriat thar tir leh thin,” an ti bawk.
Second Harvest hian Swift sum thawh zat hi an puang lo a, mahse, mi 75,000 puar taka hrai theihna tur a ni tih an puang a ni.
Swift hian Eras Tour show a neihna khua a food bank-ah sum a thawh fo tawh a, chung zingah chuan Glendale, Arizona leh Las Vegas te pawh an tel a, nikum December khan Community Foundation of Middle Tennessee-ah dollar maktaduai khat a thawh tawh a, October thla tir kan Feed America-a dollar maktaduai nga a thawh tawh bawk.
Taylor Swift hian kum khat chuang Eras Tour a kalpui tawh hnuah November ni 1-3 chhung hian Lucas Oil Stadium, Indianapolis-ah show a nei ang a, chutah November ni 14-16 leh 21-23 chhungin Rogers Centre, Toronto-ah show nei lehin, December ni 6-8 ah BC Place, Vancouver-ah show nei lehin a Eras Tour a khar tawh rih dawn a ni.