Taylor Swift-i’n record siamin ‘The Eras Tour’ a khar ta

An rama December ni 8 zan khan Taylor Swift chuan Vancouver, Canada-ah ‘The Eras Tour’ a khar ta a, show vawi 149 nei hmanin, ticket maktaduai 1,01,68,008 hralhin a sum hmuh zawng zawng chu dollar 2,07,76,18,725 a tling a, musical tour atanga dollar tluklehdingawn hnih hmu tling thei hmasa ber a ni.
Chhut buai vak pawh ngai loin tihian The Eras Tour hi khawvela tour awm tawh zawng zawnga sum hmu hnem ber a la ni. He tour hi March ni 17, 2023 khan Glendale, Arizona-ah a kick off a, North America bakah Australia, Asia leh Europe te fangin, a kalna apiangah a ticket a ticket hralh that loh a awm thei lo a, show a neihna hmun apiangah a khawtual mi thlengin an lo hlawkpui zel a, hei vang hian ram leh state hrang hrangin an rama Eras Tour hi nei turin Swift hi a sawmin an sawm zawk hial a ni.
He tour-ah hian sum an hmu tha a, ticket maktaduai 10 chuang an hralhna bakah merchandise zawng zawng nen chuan Eras Tour sum che vel hi dollar tluklehdingawn 3 chuang ni turin an chhut a, sum che vel a lian tham bawk a, Swift lah midang te tana inphal thin a lo ni ve sa bawk nen Eras Tour atana a thawhpui- truck driver, merch team, production staff, carpenter, dancer, band, security, choreographer, hair, make-up & wardrobe team, physical therapist leh video team bakah kil hrang hranga tawktu zawng zawng tan an hlawh tur pangngai bakah bonus atan dollar maktaduai 197 a sem chhuak niin E! News chuan a tarlang.