Taylor Swift-i’n Spotify record a siam

US-a Eras Tour a neih zoin, US pawn lamah a feh chhuak tan a, hetiang karah hian Taylor Swift chuan Spotify-ah record a siam leh ta a, hmeichhe zaithiam zinga he streaming platform-a thla khata ngaithlatu maktaduai 100 nei tling thei hmasa ber a ni.
Spotify chuan he chanchin thar hi social media kaltlangin an puang a, “Lalnu tihawm a ni. August ni 29 khan Taylor Swift chu hmeichhe zaithiam zingah Spotify history-a thla khatah ngaithlatu maktaduai 100 nei tling thei hmasa ber a ni ta,” tiin an tarlang.
Taylor Swift hian US-a Eras Tour a zawh hnuah, US pawn lamah a fehchhuak tan tawh a, kar liamta pawh khan Foro Sol, Mexico City, Mexico-ah show tum li a nei leh tawh a, “Mexico City-a zai hi hman atanga ka lo chak tawh a ni a, fans duhawm leh inphal tak tak te zingah vawi li ka zai thei ta,” tiin a Instagram-ah a post a, “He tour a hriatreng tur thil tam tak kan tih ho te hi ka va lawm em…Ka hmangaih che u,” a ti bawk.