Taylor Swift leh Travis Kelce an in-date em ni?

Taylor Swift leh Travis Kelce an in-date em ni?
Taylor Swift leh Kansas City Chiefs player Travis Kelce te chu an in-date niin thu a thang a, anmahni lamin engmah an sawi chiang si lo, mahse, hetianga sawi laih laih a awm tawh hi chuan eng emaw deuh a awm chu a ni duh khawp mai. Hetiang boruak karah hian Travis-a unaupa, NFL star Jason Kelce tawngkam hian Taylor leh Travis te inkarah ri deuh ret ret a awm ni a ngaihna a tilian lehzual ta a ni.
September ni 14-a Jason Kelce te team Philadelphia Eagles-in Minnesota Vikings an hneh tuma post game interview-ah Jason hi a unaupa Travis-a hmangaihna zinkawng hi an zawt a, “Thulengvak hi ka lo hre ve a…engmah ka sawi thei lo. Travis-a hmangaihna zinkawng hi in tuipui hlawm leh lutuk. Eng nge thil thleng ka va hriatpui lo. Travis hian hlim takin hun a hmang tih ka hria a, tunge a hlimpui chu kan la hre chhawm mai ang chu,” a ti.
Taylor leh Travis te inkar hi July thla atang khan sawi thawi deuh thuak thuak a awm tan tawh a. Taylor-i Eras Tour Kansas City-a an nghah tumin Travis hian Taylor hi hmuh a lo tum tawh a, mahse an intawng ta lo. Hemi chungchang i July ni 26-a an New Heights podcast-ah an unau hian an sawi a. Travis chuan, “Hla 44 sa tur a nih avangin a aw a khek a, show a neih hmain a tawng a rem lo kha ka lunghnur khawp mai. A tan liau liaua ka banbun (bracelet) siam ka pe thei ta lo a, ka na deuh lek lek a ni,” a ti
Swift-i Eras Tour-ah hian concert a kal ten banbun inpek hi thil tihphungah an nei a, a lar hle a ni. Travis chuan, “Keipawhin ka dawng nual a, mahse, ka number chuanna ngei mai kha Taylor Swift han pek ve kha ka duh a,” a ti.
Taylor-i hian Travis te titi hi mipui hriatah chuan chhang let hran lo, mahse, kumtir lam khan a ngaihzawng Joe Alwyn nen an inthen a, khami hnuah khan ngaihzawng a neih awm thawm a la awm leh ta lo. Travis pawh hi Maya Benberry nen thla riat vel an inzui hnuah an inthen a, chumi hnuah model Kayla Nicole nen kum nga dawn inzuiin an inthen ve leh tawh bawk a ni.