Taylor Swift leh Travis Kelce an inhual

Taylor Swift leh Travis Kelce an inhual
Pop superstar Taylor Swift, kum 35, leh a ngaihzawng, inkhelh thiam Travis , kum 35, te chuan an rama August ni 26 khan Instagram-ah an inhual thu an puang a. Kelce hi Swift hmaah thingthi deuh hnâpin, zungbun phawrhin, Swift chu inneih puiah a sawm a, Swift hian Kelce thingthi lai hmai a a dawm lai thlalak post-in a caption-ah “In English zirtirtu leh gym zirtirtu te an innei dawn e,” tiin an dah.
Thlalak an postah hian pangpar huan mawi taka romantic tak taka an awmdun lai thlalak te pawh an dah tel a, Swift hian an inhualna zungbun chu a tilang deuh vah bawk.
Taylor Swift leh Travis Kelce te hi kum hnih vel an inzui tawh a, 2023 khan Kalce hian a u Jason Kelce nena an New Heights podcast-ah Taylor Swift a star thu hi puangin, Taylor Swift Eras Tour-ah a kal thu leh, Swift hi a phone number a tarlanna friendship bracelet pek ngei a tum a pek theih tak loh avanga pawi a tih thu te a puang ta a ni.
Hemi hnu lawk atang hian an inzui a ni chhunzawm ta deuh mai a, Swift hian Kelce khelhna Kansas City Chiefs game a en ve nghal ngat a, chuta tang chuan engkim a kal dik ta thlup mai a ni.
An inhual thu puanna Instagram post pawhin entu a ngah nghal khawp mai a, an post atanga darkar khat chhungin ‘like’ maktaduai 14 a tling nghal a, nimin tlai lam dar 3 thleng khan ‘like’ maktaduai 27 a tling hman tawh a, repost maktaduai 2 a tling tawh bawk.
Travis Kelce leh Taylor Swift te inhual thu chuan entertainment khawvel a luah hneh hle a, Swift hian niminpiah khan Instagram lamah an inhualna zungbun pawh a tilang va va. Chu zungbun chuan ngaihven a hlawh nghal khawp mai.
He zungbun hi Artifex Fine Jewelery tana jewelery designer Kindered Lubeck leh Travis Kelce te kutchhuak, Old Mind Brilliant a ni a, a laiah lunghlu lian deuh tak awmin, a sir tawna lunghlu te deuh zawk a awm leh ve ve bawk. He zungbun design-naah hian Kelce leh Lubeck te hi an thawk dun a, Kelce hian a idea te pawh a thawh ve ngei a ni.
Zungbun man hi puan a ni lem lo a, mahse Artifek Fine website-ah chuan Lubeck design zungbun te hi dollar 4,300 atanga dollar 38,000 man te an ni a, mahse, Kelce-a’n a duh dana a siamtir zungbun hi chu a laia lunghlu a lian bik bawk a, dollar maktaduai khat man vel ni turin an chhut.