Taylor Swift ‘The Fate of Ophelia’ kar 8 a No.1 ta
Taylor Swift ‘The Fate of Ophelia’ kar 8 a No.1 ta
Taylor Swift hla hit ‘The Fate of Ophelia’ chu Billboard Hot 100 (US singles) chart-ah a No.1 a, he chart-a kar riat a No.1-na a ni ta a, a hla hit dang ‘Anti-Hero’ record, Swift hla zinga he chart-a No.1 ni rei thei ber record a nihrual ta. Hetihrual hian Krismas hla a lar leh tan tawh a, Mariah Carey ‘All I Want for Christmas Is You’, Wham! ‘Last Christmas’, Brenda Lee ‘Rockin’ Around the Christmas Tree,’ leh Bobby Helms ‘Jingle Bell Rock’ te pawh chart top 10-ah an rawn lang thar ve leh ta bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Taylor Swift ‘The Fate of Ophelia’ hian kar khat chhungin stream maktaduai 21.6, radio airplay ngaithlatu maktaduai 62.1 leh sales 25,000 a la nei thei a, hei hi a kar riat nan chart-ah a No.1 pui leh ta a, he chart-a a lan tan atangin a zawnin kar riat a No.1 ta a, January 2021 a Olivia Rodrigo hla ‘Drivers License’ hnu a, hetiang tileh thei hmasa ber a ni. He chart-a a lan atanga a zawna kar riat chin No.1 ni thei hla pariatna a ni bawk.
Chart No.1 hlui KPop Demon Hunters soundtrack HUNTRIX “Golden” chu No.2-ah bawk awm lehin, chart No.1 hlui tho Alex Warren “Ordinary” pawh No.3-ah bawk a la awm a, Olivia Dean “Man I Need” pawh No.4-ah bawk a la awm.
Krismas rim a nam leh tan ta bawk a, sapram lamah pawh Krismas hlain play a hlawh leh tan ta a, Mariah Carey Krismas lengzem hla chuai thei lo “All I Want for Christmas Is You” chuan stream maktaduai 22.2, radio airplay ngaithlatu maktaduai 16.4 leh sales 2,000 nei lehin, No.8 atangin No.5-ah a insawn leh ta.
He hla hi 1994-a a tlangzarh kha niin, a vawi khat nan December 2017 khan chart top 10 a kai thei chau a, December 2019-ah No.1 kaiin, chuta tang chuan kumtin December thlaah chart No.1 a la kai ta ziah a, tunah hian chart-a a No.1 tawh zawng zawng belhkhawm chu kar 18 tling tawhin, he chart-a No.1 ni rei ber, kar 19 record pawh kuminah a lehpel thei tawh ngeiin a rinawm.
Wham! Krismas lengzem hla ‘Last Christmas’ pawhin stream maktaduai 20.5, radio airplay ngaithlatu maktaduai 15.9 leh sales 1,000 nei lehin, No.11 atangin No.6-ah a invawrh ve leh ta bawk. He hla i 1984-a tlangzarh tawh kha niin, nikum khan No.3 a kai a, hei hi he chart-a a thlen sân ber a la ni.
Brenda Lee “Rockin’ Around the Christmas Tree” pawhin stream maktaduai 19.3, radio airplay ngaithlatu maktaduai 15.4 nei lehin, No.13 atangin No.7-ah a invawrh a, he hla hian an tlangzarh atanga kum 65-na, 2023 khan December thlaa kar thum chhung chart No.1 a rawn ni thei.
Krismas hla dang Bobby Helms “Jingle Bell Rock” pawhin stream maktaduai 17.8 leh radio airplay ngaithlatu maktaduai 15.9 nei lehin, No.14 atangin No.8 a kai a. He hla hi 1957-a tlangzarh tawh kha niin, a zawnin tun kum nga chhung chu December thlaak chart No.3 a la kai ziah a, kuminah pawh a kai leh thei ngeiin a rinawm.
Leon Thomas “Mutt” chu No.6 atangin No.9-ah a tawlh a, chart No.2 pawh lo ni tawh, Taylor Swift ‘Opalite’ chu No.5 atangin No.10-ah a tawlh ta bawk.