TB vei tam thei zingah khaw 185

Mizorama khaw 185 chu Tuberculosis (TB) natna veitu tam thei zingah an awm.
TB natna umbo tuma sawrkar laipui Ministry of Health & Family Welfare hmalaknaa “100 Days Campaign” chu Mizoramah pawh kumin March 24 atang khan kalpui tan a ni a. Mizorama district zawng zawngah kalpui vek a ni.
He campaign-ah hian TB hluar theihna hmun bika ngaih – ‘High Risk Village /Ward’ chu ngaihpawimawh a ni a. Heng hmunah hian mipui zawng zawng screen vek a ni. TB vei awlsam bika ngaih zunthlum nei, vaihlo zial zu, zu in mi, kum 60 chunglam, chuap TB damlo chenpui phei chu endik ngei ngei tur an ni. TB venna damdawi hi mipui tam thei ang ber hnenah pek tur a ni bawk.
Aizawl khawpui chu High Risk Ward veka chhiar a ni a. Heng bakah hian TB inkaidarh awlsamna hmun, a huhoa awmkhawmna leh hnathawhna hmun hrang hrangah screening hi kalpui vek tur a ni.
March 24 atanga April 12 chhunga beihpui thlakah hian high risk village 185, screening camp nei zat – 57, urban area-a screening neih zat tum 11, thingtlang lama screening neih zat tum – 46, mipui inentir – 4003, x-ray hmanga test – 1777, TB hmuhchhuah – 86 leh TB venna (TPT) pek – 355 an awm a ni.