Teh theih loh khawpin Tlawng a nu!

Kumin chu Tlawng a nu thei em em mai a, lak tlak loh khawpa a nut thu pawh ‘news’ a ni lo mai ang tih hlauhawm khawp a ni – thenkhat phei chuan an en liam mai mai tawh mai thei!
Kum hmasa lamah pawh Aizawl tui tlan Tlawng hi a nu fo a, in atana pump chi loh khawpin a lo nu fo tawh. Kumin hian a zual tih thu dawn a ni.
Mipui hnena sem tura Tlawng tui lak hnathawktu PHE department atanga thu dawn danin, kumin hian a tehna pawhina a teh theih loh khawpin Tlawng hi a nu fo a, Thawhtanni, September ni 2 pawh khan teh theih loh khawpin a nu.
Tui fim lam tehna hi NTU (Nephelometric Turbidity Unit) an ti a, PHE department khawl hian NTU 1000 thleng a teh thei. September ni 2 khan NTU 1000 a pel a, khawlin a teh pha lo.
Tui hi NTU 5 hnuai lam a nihin mipui hnena sem tlakah ngaih a ni a, tui a lo nu deuh a nih pawhin an pump tho a, NTU 5 hnuaia a awm theih nan an tifim thin. A nut viau chuan a tihfim hi a hautak a, hun a duh bawk.
September ni 2-a NTU 1000 chuang a nih khan, mipuiin tui an mamawh tho si a, pump chi a ni lo ti lovin an pump tho a, litre maktaduai 30 vel pump thei an ni chungin chumi zatve chauh chu an pump. An sawi danin, pump teuh kha awmzia a awm lo a, a tihfim a hautak a, tihfim chhung a rei dawn bawk a, chuvangin mamawh zualpui phuhru tur tawk an pump chauh.
A tuk, Thawhlehni-ah pawh a la nu ngang mai a, mahse a tehna khawlin a teh thei tawhl NTU 840 te a ni.
PHE department hotute chuan tui a nut viau hian a tifim turin a bawlhlo leh a hmanraw lam a hautak a, hun a duh rei bawk. A tifim tura hun an hman rei hian a sem a nghawng leh a, chuvangin a nut viau chuan pump hnem hi awmzia a awm chuang lo.
May ni 28-a remal cyclone a tleh hnu khan Tlawng hi a nu deuh reng tia sawi theih a nih thu an sawi a, a tehna lama a san bakah a nu nghet a, a nu rei an ti.
Kum dangah kha chuan tui a’n nut pawh hian a fim ve leh mai thin kha a ni a, kuminah chuan a nu nghet tlat a, NTU 1000 a pel fo, thla thum vel chhung a nu tawh tia sawi theih a ni, an ti.