Tek tla ‘natural disaster’ a puang turin duh

State thenkhatte chuan ‘tek’ chu ‘natural disaster’ khuarel chhiatna a puang turin sorkar laipui an ngen a, a chhan ber pawh tek tla avanga nunna chan te chuan natna dang avanga nunna chan te a khum thin vang a ni, tiin National Disaster Management Authority (NDMA) member secretary Kamal Kishore chuan a sawi a. Kishore chuan hei hi ngaihtuah zui ngai tiin a sawi.
Tuna thil kalphung pangngaiah chuan cyclone, khawkheng, lirnghing, kangmei, tuilina, tsunami, thlipui, leimin, vur tawlh, cloudburst, pest attack, frost leh cold waves te chu disaster tiin State Disaster Response Fund (SDRF) Centre in 75% fund a pek hmang thei tura tih a ni a.
Mrutyunjay Mohapatra, Director General, India Meteorological Department (IMD) chuan kum tinin India ramah tek tla avanga nunna chan 2,500 vel awm ang ziah a nih thu a sawi.
Bihar’s Disaster Management Minister Shahnawaz Alam chuan tek tla avanga nunna chan tamna chhan chu climate change vang a ti a, a kum telin a nasa tail tial tia sawiin, Bihar state ah tun hnai kum nga chhungin tek den avanga nunna chan 1500 an chuang tawh tia sawiin kum tinin mi 300 vlein nunna an chan phah ziah tiin a sawi.
Heng thute hi National Platform for Disaster Risk Reduction Conference (NPDRR) Delhi a neihah sawi a ni a.
Mohapatra chuan he conference ah hian presentation siamin tek tla chu a bik takin northeastern states leh West Bengal, Sikkim, Jharkhand, Odisha leh Bihar-ah a nasa zual a ti a, mahse, nunna chan tamna ber zawk chu Madhya Pradesh, Maharashtra, Chhattisgarh leh Odisha-ah te a nih thu a sawi.
“Region hrang hrangah tek tlak dan a inang lo nuai a, tlangramah chuan zanlai leh zing lamah a nasa zual a, phaizawlah chuan chhun laiah a nasa thung. Hei vang hian phaizawlah chuan nunna chan an tam phah a ni,” tiin Mohapatra chuan a sawi a. Furpui laia tek tla chuan loneitute thihna a thlen nasa ber a ni, tiin a sawi bawk.
India chu khawvel ram panga zinga tek tla tur hrilhlawkna early warning system nei a nih thu a sawi a, tek tla tur chu a hma ni nga atanga a tlak tak tak hma darkar thum hma thlengin a hrilh lawk thei a ti bawk a.
Hitesh Kumar Makwana, Additional Secretary, Ministry of Home Affairs, chuan corpus Rs 5,000 crore nei tur National Earthquake Risk Mitigation programme chu kalpui tum mek a nih thu a sawi bawk.