Tel siamna atan nihawichi ching uar turin loneitute fuih

Krishi Vigyan Kendra (KVK) Serchhip District leh Agricultural Technology Management Agency (ATMA) Serchhip District tangdun buatsaihin Thawhtanni khan ‘Sunflower (Oilseeds) Technology’ tih thupuia hmangin Joint Field Day hman a ni a, nihawichi atanga tel tharchhuak tam tura hma lak a pawimawh dan inzirtir a ni.
East Lungdar Tuipui Zaua nihawichi chinna hmunah ‘field day’ hi neih niin, Tuipui Zaua nihawichi chingtute leh Leng khua atanga nihawichi ching thar duh mi 20 vel an tel. KVK Serchhip head & senior scientist Dr T Vanlalngurzaiva chuan hriak pai thlai chin uar a pawimawh dan leh department hmalak tum dan a sawi a. Tel ei chia intodelh chu sawrkar laipui hotuten an ngaihpawimawh avangin hemi lama tan lak chuan centre atanga intanpuina sum hailuh pawh a harsat a rinawm loh tih a sawi.
Tel herna khawl chu KVK-in a nei thuai dawn tih sawiin, mahni tel thar leh her ngei kan hman thuai theih nan theihtawp chhuah a tul tih a sawi a ni.
KVK subject matter specialist (Agronomy) Kenny Zohmingliana chuan nihawi chin dan tha a sawi a. Zawhna awmte chhangin, nihawi chinna hman an tlawh a, hrilhfiah ngai an inhrilhfiah a ni.
KVK Serchhip District hian Agronomy discipline hnuaiah kum 2016 -2017 atang khan nihawichin zirbingna a kalpui tan a, khawchhak lam leh India ram hmun hrang hrang atangin a chi (variety) tha lakhawmin, Serchhip district leilung leh boruak mil tur leh a chin dan phung bakah a enkawl dan leh hriak sawr thlengin a zirchiang a. Sailam, Zawlpui leh East Lungdarah hlawhtling taka enchhin niin, kuthnathawktute ngaihven a hlawh thar hle. Sawrkar laipui hnuaia NMEO scheme-ah zau zawka kuthnathawktute hnen thlen tumin hma lak mek a ni tih an sawi bawk.