Tel tharchhuak tam turin sawrkarin
lian takin hma a la – Agriculture minister
Tel chu kan ei nasat thil a nih avangin tam zawka thar tumin state sawrkarin lian takin hma a la tih Agriculture minister C Lalrinsanga chuan a sawi.
Zirtawpni khan Serchhip Agriculture Complex a RKVY RAAFTER 2021-22 atanga din bekang hriak herchhuahna khawl thar leh a dahna in thar chu Agriculture minister hian a hawng a. Tel kan ei nasat avangin tel thianghlim ei a pawimawh a. Tel chu kan tharchhuah theih thlai a nih avangin loneituten nasa zawka tel lam chi kan thar a tul hle, tiin, sawrkar pawhin hmalakna lian tak tak a kalpui reng tih a sawi. Kan tharchhuahte awlsam taka her zung zung theihna’n a herchhuahna khawl chu a tangkai hle dawn tih sawiin, a herna khawl lian zawk hi Falkawnah bun tura hma lak mek a ni tih a sawi bawk.
“Mizorama loneitute kalkawng hi cooperative movement nena inhnerem taka kan kalpui avangin hma kan sawn zel a, kan thlai tharte pawh India ram pawnah, USA thlengin kan thawnchhuak tawh,” a ti. Sawrkar chuan loneitute hmakhua a ngaihtuah nasa a, oil palm chingtute hmakhua pawh a ngaihtuah zel tih a sawi a ni.
Minister hian oil palm chingtu chhungkaw 100 hnenah aluminium leilawn leh hreité (Tomahawk) a hlan a, Serchhip district-a thlai chingtu intelkhawm – Farmer Interest Group panga – Leng, Hualtu, Zawlpui-Chamdur, E. Lungdar leh Thenzawl hnenah multi purpose crates (plastic basket) 20 theuh a hlan bawk.
Agriculture director James Lalsiamliana sawi danin, oil palm chin chu Mizoram Assembly-in kum 2004-ah a pass a, company-te nen inremna siamin, kum 2005 atangin chin a ni. Godrej Agrovet-in Bukvanneiah a herna khawl a din a, tun thleng tha takin a la kalpui. Kum 2008 atangin loneituten an hralh tan a, tunhnaiah oil palm tharchhuah a pung hle a ni. Sawrkar laipuiin a man hi oil dangte man a bithliah thin mila a bithliah ve tak avangin, thlatina rate a danglam ve hret hret a, tunah hian kg.1 Rs. 10.54 vel a ni. Central scheme a nih avangin central duhdan zulzuia kal ve zel a ngai a ni.
Hriak herna khawl thar dahna in hi RKVY- RAAFTER 2021- 2022 sum, nuai 20-in sak a ni a, hriak herna khawl hi nuai 2.8 a lei a ni. Khawl hian bekang, chhawhchhi, tel antam leh badam te a her thei vek a, bekangah an insawrbing deuh dawn a ni.
Serchhip district-ah hian oil palm hi khaw 12-ah chin mek niin, chhungkua 334-in a huan an nei a, kung 47762 an enkawl mek a, ram hectare 386 a zauah an chinga ni. Serchhip district atanga oil palm hralh tawh zawng zawng hi quintal 4777 a ni a, chhungkaw 53 chauhin an la hralh thei a ni.
Tel tharchhuak tam turin sawrkarin lian takin hma a la – Agriculture minister
Get real time updates directly on you device, subscribe now.
Prev Post
Next Post