Territorial Army-a lakte training dawn
166 Infantry Battalion Territorial Army (Home & Hearth) a thawk tur, Mizo thalai thlan hmasa ber 144, mipa 135 leh hmeichhia 9 chu Thawhtanni khan Aizawl atangin chief minister Lalduhoma’n a vailiam. May 15 khian training turin Shillong an pan ang.
Home minister K Sapdanga, Champhai South MLA leh Territorial Army Establishment & Coordination Committee chairman Lt. Col. (Retd) Clement Lalhmingthanga, Home secretary Vanlalmawia, TA Group Eastern Command commander Brig.Manoj Kumar Patel bakah Armed Forces leh Assam Rifles officer leh state official-te an tel.
Chief minister chuan, Territorial Army a awm tih pawh tunhmain a lo la hre ngai loa, an hriat rualin sawrkar laipui thuneitute hnenah Mizo Battalion pe ve turin a dil a. A tirah mi 70 lak an phalsak a, a taka an lak hmain an dil belh leh a, mi 144 lak an phalsak ta tih a sawi. Prime minister Narendra Modi, Union Home minister Amit Shah, Defence minister Rajnath Singh leh chief of Army Staff Gen. Upendra Dwivedi chungah an lawm hle tih a sawi a ni.
A dang lak belhna tur an buaipui leh mek a. Mizo thalai, a tam thei ang ber lut se, eizawnna a nih piahlamah ram venhimna a ni a, a zahawm a, nunkawng kaihruaitu tha a ni bawk si a, thahnem an ngai hle tih a sawi bawk.
Home minister pawhin Territorial Army hian thiamna (civilian excellence) leh sipai (military) discipline tha a keng a, zahawmna leh hmingthanna a thlen theih bakah nungchang siamthatna a keng a, a tha em em tih a sawi. He hnaa tling tharte chu an mawhphurhna hlen ngei turin a chah.
TA Group Eastern Command commander chuan Mizo Territorial Army hi chief minister Pu Lalduhoma hmalakna leh a thawhrimna zara awm a ni, tiin, TA post ruak a la tam a, a theih chuan hnawhkhat zel an duh tih a sawi. Mizoram sawrkar aiawha TA buaipuitute chuan lak belh an dil leh mek a, kumin September hian advertisement tihchhuah hman an beisei dawn tih a sawi a ni.
Tun tuma lakte hian thla thar atangin training an tan dawn a. Chumi hmaa tihfel ngai tifel turin tun thla laihawl hian Shillong an pan ang. Mipa 135 hian Shillong-ah training an nei zui anga, hmeichhia 9 hi Bangalore-ah an training thung ang.