Thailand-ah Move Forward ten beisei

Reformist party leader Thailand inthlana chakna changtu chuan coalition sorkar an din theih ngei a beisei thu a sawi.
Pita Limjaroenrat chuan Move Forward party te chuan party tenau pasarih te nen inzawmna siamin vote 376 awmah 313 an neih thu a sawi a.
Mahse, Thailand parliament inrelbawl dan avangin sorkar an siam thei ngei ang tihchianna a awm thei miah lo thung.
Thailand parliament-ah hian elected seat 500 lower house-ah a awm a, Senate-ah military te ruat unelected position 250 a awm bawk.
Senate member te hi military te ruat vek niin hei vang hian sorkar siam an dal hlauhna a lian hle a. Mahse, Puta chuan an party chuan democratic taka thlan tlin an nihna chu hai theih a ni lo tiin a sawi tawh thung.
Pathiannia inthlanah chakna an chang tih a chian hnuah Move Forward te chuan party lian ber pahnihna Pheu Thai te chu an be zui nghal a. Move Forward te hian seat 500 ah 152 an la a, Pheu thai te hian 141 an la thung.
Inbiakna neih a nih hnuah Move Forward leader chuan Ningani khan inremna an siam theih tak thu sawiin sorkar thar siam thei an nih tak thu a sawi a.
“Lower house a vote 313 neih chu democratic system pangngaiah a tawk hle a, thawhpui dang neih belh kan tum tawh lo” tiin a sawi.
Move Forward te nasa taka Thai mipui tena an thlan tlinna leh opposition leader pahnih te inlungrualna chu Thai mipui tena kum 2014 hnua sipai tena rorelna an lekkawh an hnezia lantirna anga ngaih a ni.
Senate-a member 250 te hi sipaite ruat ni thungin prime minister thar thlan turah vote an nei thei tlat thung si a ni. Mahse, Move Forward te chuan Senate-in Move Forward te sorkar siam a hnawl a nih chuan mipui duh dan a hnawlna a ni dawn an ti ve thung.
Move Forward te hi a bik takin Thailand thalai tena an bawh em em niin dan siam that leh Thailand kalphung inrelbawlna siam that intiam an ni a, chung zingah chuan royal family-te sawisel khap burna pawh tihtawp tum a ni.
Mahse party lian ber pathumna seat 70 latu Bhumjaithai te chuan Move Forward te reform aupui chu an duh loh avangin an thlawp dawn loh thu an sawi thung a. Mahse, Move Forward te chuan Bhumjaithai te chu an sawm ve loh thu leh an tel lova lower house a majority an neih phak thu an sawi thung.