Thailand ramah German mi taksa bung chhar a ni

Nimin Nilaithawhtanni khan Thailand khawpui pakhat Pattaya ah chuan German mi taksa bung Chest Freezer chhungah chhar a ni. He German pa hi kar khat chhung bo tawhin, rinhlelh thu ah German mi tho mi pahnih thu zawh fiah atan thu neitu tawn a hreng nghal a ni.
He German pa hi Hans Peter Mack niin kum 62 a upa a ni a, ram zawrh leh hralh a eizawng niin kar khat chhung a bo hnu hian a chanchin ngaihvena chhui zuina a awm lemlo a ni. Amaherawhchu, he vanduaina a tawhna leh a chin hriat loha a awmna hi a taksa bung te Freezer chhunga hmuh a nih atang hian amah chu ngaihven nghal a ni a, he an hmuhna hmun hi Chonburi province chunglam Nong Prue niin Pattaya khawpui hmar lama awm a ni.
Thu dawnna in a sawi danin Mack hi a nupui nen an chenna hmun Pattaya ah Mercedes Sedan motor a khalh lai hmuh a ni a. Mack zawn a nih lai hian a chhungte chuan Thai pawisa maktaduaih 3 (3 million baht) chu chu US Dollar 86,000 lai mai Mack chanchin hrilh thei apiang hnenah pek an tiam hial a ni. Pattaya khawpui police officer pakhat Tawee Kudthalaeng sawi danin pawisa tam tham tak Macka account atang hian ruk bo a ni a, hei hi Macka thah a nih chhan ber ah an ngaih thu a sawi. Police officer chuan thil chipchiar tak erawh a sawi duhlo a, hnu chhui mi te chuan rinhlelh tamtak zingah German mi tho te leh Thailand ni rinhlelh te an nei a ni.
Hetihlai hian tualchhung chanchinbu mite chuan kum 52 a upa German pa chu Bangkok ah man a nih thu leh kum 47 a upa German hmeichhia chu ama thu-a a inpek thu an dawng a. Tualthattu te hi man an nih thu finfiah a ni leh he thil a inhnamhnawih mi pakhat dang zawn mek a nih thu police te chuan an sawi a ni.