Thal laia lirthei tan tlan hlauhawm kawngpui chhia neih hi a zia lo hle – Dr K Beichhua
Thal laia lirthei tan tlan hlauhawm
kawngpui chhia neih hi a zia lo hle
– Dr K Beichhua
State chawmhlawm ni mekin fur lai pawh ni lo, thal laia eibar lakna ber kawng chhiat avanga lirthei lian tlan hlauhawm khawpa kan awm ringawt chu a zia lo hle tih BJP MLA Dr K Beichhua chuan a sawi.
Zirtawpnia BJP Mizoram office-a inkhawmah BJP State Core Group member Dr K Beichhua chuan, BJP huatna rilru neih tlat chu rilru lam damlohna chi khat, tunhmaa politics tuinu lo in tawhte an ni tlangpui tih sawiin, tun hnuah erawh thalai tam tak leh mi vengva tak tak chuan BJP hi political party pakhat ve mai a nih hria in, hlauh enin an en tawh lo niin a sawi.
Sawrkar kal tawh leh sawrkar mekte enin mipuiin rintlak sawrkar kan duh tih a chiang tawh tih sawiin, “Mizoram mipui tam zawk leh thalai vengva, eizawnna hna zawng tan chuan a beidawnthlak hle a. Tunah chuan mi pangngai tan mahni chawbel do tlat hi tih chi a ni lo. Chuvangin keini, state rethei leh chawmhlawm, thla tina sum puk tur dap ngai, fur lai pawh ni lo, thal lai pawha kan ei leh bar lakna ber kawng chhiat vanga lirthei lian tlan hlauhawm khawpa kan awm ringawt maite hi a zialo hle a, Mizoram mipui zah lohna leh mipui ngaihpawimawh lohna lian takah ka ngai,” a ti
Mizoramin sawrkar kan hrawn mek chu enchhin sawrkar an ni tih hi hriatreng a ngai tih a sawi a. “Budget Session vawihnihna kan thutkhawm hunah chuan kan enchhin sawrkar nihna hi a langchiang lehzual anga, enchhin an dawl em, tih hi mipuiin kan hre zel dawn a ni,” BJP MLA hian a ti.
India rama BJP kum 10 sawrkar chhunga ram hmasawnna nasat zia hmuhin, BJP chu hmathlir leh ram hmasawnna atan tum mumal tak nei a nih zia a langchiang a, India ram pum hmasawnna tur manifesto hmanga ram tana hna an thawhna chu ram mipuiin an chhawr mek tiha sawi. Mirethei leh hausa pawhin kan hlawkpui mek niin a sawi bawk.
Mizorama political party thenkhat politics khelh dan leh BJP politics khelh dan chu a dang hle tih Dr K Beichhua hian sawiin, “BJP chuan politic tak tak, ram hmasawnna leh ram thanna kan khel a; party dangte chuan ram thatna lam hawi an khel ve hman meuh lo. Lalna leh thuneihna hi an khelh pui ber niin a lang. Chutiang an neihna turin party dang beihna tur buaiin an hmanhlel em em a ni,” a ti.