Thalaiin BJP sawrkar tir a tul an ti – MBJP president

Thalaiin BJP sawrkar tir a tul an ti
– MBJP president
Mizoram thalai tam tak zingah leh thingtlang lamah pawh hmasawnna a awm theihna’n BJP sawrkar tir ve tul tihna a lian tawh hle tih BJP Mizoram president Vanlalhmuaka chuan a sawi.
Thawhtannia BJP State office-a inkhawmah Vanlalhmuaka chuan Mizoram thalai tam tak chuan thil tak tak an duh avangin BJP sawrkar a tul tawh hle tih an hria a, thingtlangah pawh BJP hruaitu hrang hrangte zinna report an enin, mipuiin beiseina sang tak an nei tih a hriat theih tih a sawi. “MNF leh Congress ah beisei a bo tawh a, ZPM hian nasa taka hma an la chungin, central an zawm lo hi beiseina tak tak an neih theih loh na pakhat a ni tih a hriat theih,” a ti.
NE state dangah chuan BJP sawrkarna term hnihna tur an hmang mek a, term khat chhung lek pawhin an state-ah nasa takin development a thleng tih a sawi a. Mizoramah pawh BJP sawrkar nei ve ila chuan, thenawm state-te aia nasa zawk pawhin development hi kawng hrang hrangin a thleng thei tih sawiin, “Central hian chutiang ti turin min pui thei reng a. Development tak tak a lo thlenna turin BJP sawrkarah lo chuan kawng a awm lo tih hi Mizoram mipuiin kan hriat a pawimawh,” a ti.
BJP a sawrkar chuan sawrkarah Krista lalna an thlentir anga, chumi atang chuan ringlomi kan tihten sawrkar kaltlanga Krista an hriat a, thusawi mai ni lo, kan nun leh thiltihah Krista an hmuh theih tur thu BJP Mizoram president hian a sawi. “Kan sawrkar hrawn tawhte atang chuan ‘milem bia’ kan tihte khuan kan rinawm loh avangin kan sakhuana thlengin fak a hlawh loh phah a, keimahni avanga Pathian hming sawichhiatna remchang an hmuh phah thin hi BJP a sawrkar chuan tih bo a ni ang,” a ti.