Thalaite pual ‘Y-20 Meet’ hmang
Youth Services department leh Mizo Zirlai Pawl tangdun huaihawt Y-20 Meet on Nationalism, Patriotism & Development chu Zirtawpni khan Aizawlah khuhhawn a ni.
Sawrkar laipui Ministry of Youth Affairs & Sports chuan India ramin G-20 presidency a chelh chhunga ramchhung hmun hrang hranga Youth-20 Programmes a hman mek chu Mizoramah hman a ni ve dawn a. G-20 Secretariat lamin phalna a pek tawh angin heng programme hi thalaite leh zirlaite hnena Mizoram tan, ram leh hnam tana hmasawnna thil pawimawh tak tak inzirtirna huna hman a ni ang.
A khuhhawnna hmanpuitu chief minister Zoramthanga chuan he intawhkhawm thupui zinga pakhat, nationalism – hnam thinlung chu pawimawh a tih thu sawiin, hnam thinlung chu hmanlai atang tawhin hnamdangin mahni hnam an chimral lohna’na lo piang a, hnam humhimna atanga lo chhuak a ni tih a sawi.
Hmasawnna atana hnam rilru put a pawimawh thu leh nationalism leh patriotism hmanga development a thlen theih dan sawiin, indopui avanga ram pahnih tlachhe vek Germany leh Japan chu tehkhin atan a hmang. “War reparation te pe in, economy leh politics lamah chhe vek mah se, hnam rilru nghet tak pu in an intungding leh a, tunah chuan khawvel ram hausa leh changkang ber zing ami an ni leh tawh,” a ti. Mizoram pawhin harsatna hrang hrang tawkin sum indaihlohna te thleng mah se, hmasawnna nasa zawk a la thleng thei tih hria in, hnam hmangaihna thinlung nena ke pen theuh turin thalaite a sawm tih a sawi a ni.
Youth Services minister Robert Romawia Royte chuan India ramin G-20 presidency a a chelh chhunga tangkai thei ang bera hman a tum dan leh chumi kal zelah chuan thalaite ngaihpawimawh an nih thu a sawi a. Y-20 meet chu Mizo thalaite mamawh leh an tana tangkai tura ngaih anga buatsaih a nih dan leh, fund source hranpa a awmloh avanga senso tur pawh phal taka state sawrkarin a tum avangin lawmawm a tih thu a sawi. Y-20 chuan Mizoram puma thalai 21000 huam tuma buatsaih a ni tih a sawi bawk.
Meet hawn ni hian MSACS joint director Betty Lalthantluangi chuan “Intravenous drug use & Harm Reduction Services” tih hmangin presentation a pe a. “Awareness on Social Media & Cyber Crime” chungchang ICT Department informatics officer Lalengzuala chuan sawiin, “Role of Youth in Democracy and Governance” tih hmangin Prof. J. Doungel chuan a sawi a ni.