Thangtharten Mizo pipute thawnthu an hre tlem tawh – Er Lalrinawma

Tunlai thangthar zingah Mizo pipute thawnthu zirtir tha tak tak nei hria leh chhiar an tlem tawh hle tih minister Er Lalrinawma chuan a sawi.
Social Welfare & Tribal Affairs department leh Aizawl Art Gallery tangdun chuan thalaite tana lemziah huang programme ‘Tribal Art & Craft, Young Artist’s Sustainable Development’ tih thlakhat chuang an buatsaih a, Thawhlehni khan Aizawlah khar a ni. A kharna hmanpuitu Social Welfare & Tribal Affairs minister Er Lalrinawma chuan art hian a huamzau a, Mizo khawtlang nunah phei chuan zai leh hla bakah rimawiten dinhmun sang tak changin kan ngaihlu in kan rilru a hneh hle, tiin a sawi.
Thangtharte zingah Mizo pipu thawnthu zirtir tha tak tak nei, hria leh chhiar an tlem hle nia a hriat thu sawiin, “Pipute thawnthu kha a ropui a, kan thalai leh thangtharten heng thawnthu hi kan hmelhriat mai niloin kan hlut a tul a, hengte kan hlut thiam chuan hnam ziarang chawikanna leh humhalhna a ni tel zel a ni,” a ti.
‘Tribal Art & Craft, Young Artist’s Sustainable Development’ hi sawrkar laipui Ministry of Tribal Affairs bultuma neih thin a ni a. A tum ber chu, tribal thalaiten an hnam ziarang leh chanchinte lemziah leh thil siam hmanga an lantir leh phochhuah theihna’n remchanna siamsak a ni. He programme hi Aizawl Art Gallery-in an buaipui a, art lama tui thalai 67 a inziaklut a, thlakhat chhungin art lama mithiamten an enkawl a ni.