Manipur President’s rule-a dah turin centre an phut

Manipur buainaah an state sawrkar a hlawhchham tih chiang taka a lan tawh avangin President’s rule-a dah turin India sawrkar an phut tih Mizorama hnam pual zirlai pawlte chuan an sawi.
Mizorama hnam 5 – Mara, Lai, Hmar, Paite, Bawm leh Pang zirlai pawlte intelkhawmna – Hnampual Zirlai Pawl thuchhuak chuan, Manipur buaina kal zelah mi tam takin nunna chanin, khua hial halsak an ni chu pawi an tih thu an sawi a. Khawvel indopui lai pawha thleng ngai lo, naupang leh hmeichhe awmnem zawkte pawh zuah an ni ta lo chu an rilru a na takzet tih sawiin, Meitei chet dan chu an dem hle tih an sawi.
Manipur chu ni 60 chuang a buai tawh hnuah leh mi tam takin nunna an chan tawh hnuah pawh Prime minister Narendra Modia’n hmalakna engmah a neilo chu an dem tih sawiin, Manipur sawrkar chu dan leh thupek kenkawh kawngah a hlawmchham tih a lan avangin, President’s rule-a dah turin sawrkar laipui an phut tih an sawi a. He buaina hi ruahman lawk dik tak a ni, tiin, Zofate leh Kristiante rawt chimit tumna dik tak a nih thu an sawi.
Meitei hoin ramsa ang maia rawng taka Manipura Zohnahthlak tlangval sawisa a, a lu hial an tansak chu demawm an tih thu leh Zohnahthlakte tawrhna chu enlian mai harsa an tih thu an sawi a. Manipur buainaah hian Mizoram sawrkar chu thuk zawk leh chak zawka hma la turin an phut tih an sawi bawk.
Mizoramah Meiteite thlamuang tak leh zalen taka an awm theih laia Manipurah Zohnahthlakte an thi reng chu hriatthiam har an tih thu sawiin, Mizorama Meitei awmho ten muanna leh remna a awm theihna’n a ranglama thuchhuah siam turin an phut tih an sawi.