BY: Rozuala Chhangte
-- Advertisement --
Kum 2023 Vâu thla a rawn her chho a. Congress Party chhungah sorkar tha siam tum lo; nihna khêl an pung chho zel niin a lang a. Kan lo râl thlir thiam ve dân chuan Pu Lalsawta hian rorel a lo thiam tak tak lo a nih dawn hi! Inthlan kumah a Party chhung buaina a chin fel theih loh chuan hruaitu (Leader) tha ni tlak a nih dawn loh hi tiin a ngaihtuah mite chuan rilru kan lo sêng a. An Party buaina chuan zual lam a pan zel emaw tih turin Party-a nihna tha chan pawh duh tawk lovin Party chhuahsan duh hial an hruaitu lawk zingah an lo awm ta hial a! Mahse, nikîr thla a rawn her chho a, an boruak a kâng ta zel zawk em?
Insiamthatna hun-
Pu Zodintluanga hi Politics-ah chuan ‘Fighter tha’ leh ‘GAME’ siam thiam tak niin a hriat a. Treasurer, MPCC atanga ni 21.4.2023 (Zirtawpni) a banna a thehlut hi a tih fuh loh lian tak niin a lang. A ti ta rau rau banna zahawm takin thehlut se an hruaitute tan pawm a nuam deuh ang a, a banna thehluh piah lama an President ni lâi Pu Lalsawta khati tak maia chhe lailet der anga a chhuah kha a tih sual lian tak chu a ni. Party chhuahsan si lova banna thui tham leh ngeiawm tak chu a ni phawt mai.
Pu Zodintluanga hi Party danga a chhuak a nih ngawt loh chuan Congress Party-ah nihna (Elected OB) chan hun chu General Secretary emaw, a aia hniam emaw atanga a tan tha leh a nih ngawt loh chuan a tan hmun a awm tawh dawn lo niin a lang a. Congress Party atanga a chhuah loh avang chauhin Congress Legislature Party Leader a la ni a, thla 5 vel CLP Leader nihna hun a la nei a ni. Congress Party-in nihna dang an pek a hnawlna Order hmuh tûr a awm bawk a, nihna dang a nei tawh lem lo emawni chu âw a tih theih. Mahse, tun dinhmunah thahnemngai takin Congress tan a la âu a, theihtawp a la chhuah zel chu a ni a. Eng GAME tak khelh tum ang maw? A insiam tha a nih hlauh chuan Congress Party tan lawmna nasa tak a tlin a rinawm a, a political career atan hlei hlei a tha zawk bawk ang.
Thawnthu tawi pakhat-
Kum 1999 khan New York-ah motor kawngsira dah leh Garrage-a dah a bo nasa êm êm a. Chuta a rûk bultumtu ber chu Min Jin Yung a ni. Ani hi Chinese sipai Intelligence Officer tang tawh thin a ni a. China ram atangin motor ru tûrin rethei deuh lema changin New York a pan a ni. A motor rûk a hralh lehna atanga hlâwkna a hmuh hi Dollar mtd. 40 lâi a tling a. He pawisa hi amah an man hnu pawhin hmuh lêt a ni lo.
Motor rûk hralhna sum pawh hmuh lêt a nih loh chuan mipui sum eiruk (Corruption) phei chu hmuh chhuah rual a ni lo ang. Motor rûk nen inang hauh lo mah se, a rûka la an nih miau avangin a rûk bawka an hman a ngai dawn a. An bank account-ah dah vek ngam lovin an unaute nen an inkawl tawm hlawmin a rinawm. Hetianga mi dik lo leh mi pamhamte hian Mizoram Politics hi chawlh san vang vang se, mi dik leh mi rinawm, Pathian tih mite Mizoram tan han pên chhuak zel rawh se.
|hat loh theih lohna bâwma leng lo –
Pu KS Thanga (Ex-Minister) in ni 09.06.2023 (Zirtawpni) a banna a thehluh thui tham tak kha ka lo hmu ve bawk a. “Congress Party-ah hian ka awm thei tawh lo e. He hmun atang hian chhuah ka duh a, Party dang hmanga ram siam that tumin kan chhuahsan mai ang che u,” tih chu ni se pawm a nuam thlapin a rinawm a. Mahse, Congress Party President ni lâi Pu Lalsawta a puh chhiat dan êm êm kha chu mi puitling zia a ni lo deuh. Tin, amah hi Congress Party avanga tun dinhmuna ding thei hi niin a lang si a. Pu Lalsawta, Congress Party President a beih chuan Congress a bei tihna a ni a, mimal thil tak angin lang mah se, a nihna neitu zawk pâwl a bei tel tihna a ni bawk a. Congress Party tan lawmna chi a ni hauh lo ang.
Ka ngaihtuahnaa lo lût ta zel chu Social Media-a rawn darh vak Contractor Pu F. Kapsanga te hnen atanga chêng nuai 50 lak tih vel chungchang kha a ni. Pu Lalsawta chuan, ‘a dik ka ti lo a, an inah kan nupaa kalin cheng nuai 25 kha kan dah let leh a ni,’ a ti lawm lawm a. Khaw nge cheng nuai 25 dang chu a awm tâk? A awmna tûr chu a chiang reng mai lo’m ni. An inpek dan, an lâk dan lam chu engpawhnise kan zu hriat phak pawh va ni suh, “Bui chhia laih lohin a inpuang,” tihna a ni mai. Rukru chu ûm lohin an tlanchhe thin an tihte ka ngaihtuah chhuak ruâi mai. Pu Lalsawta’n khin ruâlah ngai lova a umzui duh lo te hi a va ringtu zia tak êm!
Ngaihtuahna ti thui-
Eiru duh, mi dik lo tan ‘that loh theih lohna bawm’ Pu Lalsawta lehkhabu ziah hi a rimchhiain a tenawm ang a. Mahse, mi dik leh mi rinawm, Pathian tih mite tan chuan he ‘that loh theih lohna bawm’ hi a hlu em em a, ‘Book of the Year’ hiala thlan chi a ni. He ta leng lo nia inngai mahni inhrechiang te chuan Congress Party an chhuahsan mêk niin a lang a, he Party hi chawp leh chilhin (Automatic-in) a inthian fai a, ni tin mi tha tak leh mi dik tam takin an bawh chho mek zel zawk niin ka lo hmu ve a ni.
Pu Lalsawta’n Pathian a tihzia, a dik leh a rinawmzia, a rilru thatzia a lang chiang zel a, mi tak tak a nihzia a lang chho zel zawk niin ka hmu chhuak ta bawk.
A tlipna-
“Thil tha lo titute avângin inti lungngai duh suh la. Fel lo taka tite chu awt hek suh. Hlobet angin ah thlukin an awm thuai ang a, Hnim hring angin an la vuai dawn si a. Lalpa chu ring la, thil tha ti rawh; He ramah hian awm la, rinawmna um zel rawh. LALPA chungah chuan lawm bawk rawh; Tichuan i thinlung duhzawngte chu a pe ang che. I awm dan tûr chu LALPA chungah nghat la; Amah chu ring la, aman a ti vek ang. I felzia chu êng angin a chhuahtir ang a, I thiam chanzia pawh chhun lai ang maiin. LALPA-ah chuan chawl la, amah chu nghak fan fan rawh; A awm dana vanneihna dawngtu avângin intilungngai duh suh, Ngaihtuahna sualte puitlintu avâng chuan.” (Sam 37: 1 – 7)