Vision leh a hlawhtlinna…

Vision tih hian tihhlawhtlin tur ruahman lawk hi a kawk bik awm e. Tun hnaia ‘Rorelna dik duhtute’ huaihawt ‘Party Policy Zirchianna’-ah khan party hrang hrangte ‘vision’ ngaihthlak a ni a, an vision a tha hlawm hle a, tu party pawh khan sawrkarna siamin an vision kha thlawhtling thei se, Mizoram hmasawn awkna tham vek a ni ang. A pawimawh lai tak erawh ‘vision tihhlawhtlin’ a ni.
Vision tih hlawhtlin tur atan hian hmasawnna ruhrel ropui leh tha tha thlan khawm chiam ringawt pawh hi a ni ber lo va, kan hmathlir leh duhthusam hi ropuiin tha viau mah se, kan ram dinhmun nena inmil tawk tur ngaihtuah thiam a pawimawh a. Power kan mamawh avangin lui zawng zawng khuah ngawt chi a ni lo va, state dang pawhin industry an thatpui alawm tiin heavy industry bun ve ngawt thei kan ni lo bawk. Kan ram dinhmun nena inmil tawk tura ruahmanna siam a ngai thin a ni.
Small scale industry kan han ti a, a tha viau; eng eng emaw hi chu khawsak ve tawk tawk theihna tur khawp chu a awm ve mai, mahse hlawkpuina tur khawpa englai pawha a mamawhtu leh a duhtute chawm reng tur khawpin engmah hi kan la siamchhuak thei lo. Sawrkar awm tawh zawng zawng khan champion pui an nei lo.
Kan ram dinhmun han en hian, agriculture leh a kaihhnawih bak hi chu han innghah theihna hi kan nei tak tak lo niin a lang. Innghahna atana kan neihchhun agriculture leh a kaihhnawih lah hi, kum 50 zet a liam tawh hnu pawh hian, inthlan dawn apianga ‘vision’ neih nan kan la hmang leih leih reng a ni mai si a.
Kan ram leilung atang hian hlawkpuina tham thawnchhuah tur thil siamchhuah theih kan nei lo va. Tuikhuah hmangin Power hi hralhchhuah tham chu a dehchhuah theih ve mai ang a, mahse kan ram zimte environment tichhe vek theitu a nih dawn avangin bawh huam huam chi a ni bawk si lo.
Hetih lai hian, political party ten vision-a an sawi lan loh, pawimawh em em si chu ‘human resource development’ lam hi a ni. Singapore ropui chhan chu ‘human resource development’ an kalpui that vang a ni tih kan hria. India chhim lam state thenkhat pawh khuan human resource an thawnchhuak nasa a, an state economy thannaah hnuhma an nei tham a ni. Hetah hian Mizoram pawh hian beihpui kan thlak thiam phawt chuan, human resource hi kan ram economy dawmkangtu a ni pha em em ang. He lamah hian sawrkarna siam apiangin na takin hma la thei se a duhawm hle a ni.