Thawhlehni Champions League inkhel

Thawhlehni Champions League inkhel
Uefa Champions League chu Thawhlehni leh nizan khan league stage khelh chhunzawm niin, Thawhlehni bik result thenkhat kan han hrutkual zawi zawi dawn a ni.
Barcelona 5-0 Young Boys
Season thar an bultanna inkhela Monaco laka mualpho ringawt tawh La Liga giants chu Olimpic Lluis Companys stadium-a an mikhual Young Boys lakah an chesual duh ta lo a, chiang zeta chakin, home team goal hnih hi Robert Lewandowski thawh a ni.
Home fans 45,097 hmaah goal a lut hma hle a, Pole Lewandowski chuan minute riatna lekah Brazil forward Raphinha siamsak atangin Barca goal khatna a thun a; first half chhungin Rapinha leh Inigo Martínez-te’n goal khat ve ve an tilut ve hman bawk.
Second half tir lamah Inigo Martinez thawhrah atangin Lewandowski goal hnihna hmuh tur a awm leh a; Catalan goal ngana leh he inkhela goal lut hnuhnungber ni zui ta hi hun tawp hnaih tawh lama own goal lut niin, Young Boys mangchhia belhchhah turin Mohamed Ali Camara chuan Alejandro Balde cross chu an lam goal-ah a tilut palh.
La Liga hmahruaitu Barca laka an tlawm leh hnuah Swiss champion hi tun season Champions League match hnihah point hmu lo zawng ve vein an khawsa a, an bultanna inkhelah khan sithum faiin Aston Villa chuan an lo hneh ve tawh bawk a ni.
Young Boys defence tiralkheltu Lewandowski kha kum 36 mi ni tawhin, Champions League history-ah kum 30 tlin hnua goal 50 chuang thun tling thei pahnihna a ni a, Cristiano Ronaldo hnung zui zo awmchhun a ni.
Belhkhawmin competition-ah Poland forward hian goal 96 a khawl tling tawh a; Thawhlehni zan khan hun tawp hmain lachhuak lo ta se hat-trick a siam thei hial tura ngaih a ni.
Goal khat thuna assist vawikhat nei bawk captain Raphinha kha Pole dawta player langsar niin, kha game-ah khan shot vawiruk ngawt neiin, hun pumin an Swiss mikhualte tan hlauhawm a tling a, pass awmze nei pawh vawiruk tichhuak bawkin, Monaco laka 2-1-a tlawm Catalan giants-in an Europe game hnihnaah chiang zetin hnehna an changkir leh nghal.
Hansi Flick-a team Barcelona khan La Liga campaign lamah chuan duhthusamin bul an tan fuh a, a zawn zatin vawisarih tehreng hnehna an chang a, mahse, karliamta Inrinni mai khan rin loh takin Osasuna mualah 4-2-in an tlawm a, Europe lamah erawh an insiamtha zui ta thung a ni.
Lewandowski leh Brazilian forward Raphinha lansarh zanah an rawlthar thawm neilian Lamine Yamal chuan goal a khung zo ve ta tlat lo a; ball zaa 75 ngawt chang Barcelona-in game an thunun nghet hmiah a, Young Boys tan counter-attack tih loh chu goal zawnna chance a awm lo a ni ber!
Red Bull Salzburg 0-4 Brest
French club hriat hlawh lo Brest chuan Champions League-ah bul an tan fuh chhunzawm zel a, Red Bull Salzburg mualah hnehna an sualchhuak leh tawh!
Champions League newcomers Brest hian thla hmasa mai khan an club chanchina Champions League match an khelh vawikhatnaah 2-1-in Sturm Graz an hneh a, tunah Austrian club luhchilhin an buzawlah ngei an va sawp leh hrep a nih hi!
Brest tan hian first half leh second half-ah Abdallah Sima chuan goal khat ve ve thunin, mikhual goal hnih dang hi second half-a Mahdi Camara leh substitute Mathias Pereira Lage-te tihluh a ni ve thung.
Kum 20 liamta mai khan Brest hian amateur level-ah an la khel lauh lauh a, tun thleng hian major domestic trophy lak an la nei lo a, chuti chungin season liamta khan Ligue 1 lamah pathumna hial an rawn hauh pha a, a vawikhatna atan Europe-a club inelna lian ber hial an khel pha ta a ni.
Tun season tharah erawh tualchhung league bul an tan fuh tawk lo a, game ruk an khelh tawhah 13-na an luah pha chauh a ni.
Inter Milan 4-0 Red Star Belgrade
Giuseppe Meazza stadium-ah mualneitu team an chungnung larh a, tun season-a a vawikhatna atan Champions League hnehna an chang.
September thlaa an Europe bultanna inkhelah Inter hi Manchester City nen goal awm loin an inhnehtawk tawh a, Thawhlehni zanah erawh English champion laka goal thun kawnga an harsatna tawh khan a tibuai ta lo a; tan atanga minute 11-na lekah Hakan Calhanoglu chuan free-kick chhuih kual ngawk chungin home team goal khatna a thun a, hei bak hi chawlhlawk hmain goal dang a luhbelh lo.
Season liamtaa loan-a an chhawr zet hnua tun nipui thawt klaia Bologna atanga a ngheta an sengluh tak Marko Arnautovic chuan second half tir lamah Italian giants goal hnihna thawh ve lehin, Stoke leh West Ham striker hlui goal tur chhawp remchansaktu hi Mehdi Taremi a ni.
Forward Taremi bawk hian minute 71-ah substitute Lautaro Martinez goal tur a siamsak leh a; minute 10 an khelh tlin leh ruala Martinez-a hlawhchhuah penalty chhuihtu atana an hmang pawh kha a phu hlein a lang!
Inter hian kartawp Serie A match-a Undinese an hnehna game atang khan player pasarih ngawt an thlak a, Europe-ah chiang takin hnehna an chang ta a ni.
September thlaa Benfica laka 2-1-a tlawm tawh Red Star Belgrade erawh match hnih khelhah point hmu lo zawng ve vein an la khawsa rih!
Bayer Leverkusen 1-0 AC Milan
Thla hmasa bultanna game-a sili fai tehrenga Feyenoord sawp tawh Xabi Alonso team-in BayArena lamah hnehna an chang leh.
Leverkusen chakna goal awmchhun hi second half tir lam minute 51-a Victor Boniface tihluh niin, Jeremie Frimpong-a goal tur dangtu Milan keeper Mike Maignan-a ball namper letleh a nanfuh atanga a thun a ni.
Italian team hian tlawm nghal mai an tum bik lo a, hun tawp dawnah Theo Hernandez-a khakper chuan goal ban fuhin, he mi chhunzawmnaah Spain striker Alvaro Morata pawhin goal sirah mikhual fans tana uiawm tak turin a tauhchhuak ve bawk.
Milan hi an bultanna inkhelah San Siro mikhual Liverpool chuan 3-1 ngawtin an lo sawp tawh bawk a nih kha!
Borussia Dortmund 7-1 Celtic
Thawhlehni zan inkhel dangah pawh insawpna lian hmuh tur awmin, Germany ram inkhelah hian first-half chhungin Karim Adeyemi chuan ‘hat-trick’ a siam hman a; a tir lam minute 42 chhungin season liamta losing finalist team hian goal nga tehreng an kawtkaiah an khung tling hman!
He scoreline namai lo tak hmang hian Dortmund chuan team 36 telna Champions League standing-ah a sang ber an luah chho nghal zawt!
Khelh hniha chak ve ve piahlamah goal difference chu an chungnunna chhan niin, Scottish club erawh pathumna atangin 19-naah an tlathla thung.
Westfalenstadion-a mipui 80,000 tehreng fuankhawm hmaah captain Emre Can chuan minute sarihna lekah penalty atangin goal hmahruai a chhuihlut a; he penalty hi Jamie Gittens laka a foal avanga Celtic goalkeeper Kasper Schmeichel-a chawi a ni.
Celtic lam hian minute hnih hnu lawkah Daizen Maeda goal hmangin an siphurh an sut mai a, hei hi hun puma an goal neihchhun a ni zui ta nghe nghe.
Minute 11 an khelh tlin rualin Adeyemi chuan a goal thum thun zinga a hmasaber hmangin mualneitu team hmahruaikirna goal a thawh a; minute 29-ah Germany winger hian 3-1 a nihna goal khung lehin, chawlhlawk hmaa a penalty chhuih hmangin hat-trick a siam a, second half tan hnu lawkah hliam avangin an thlak a, kum 22 mi khelmual chhuahsan lai hian fans lamin thawm ring takin zahna an lantir nghe nghe.
Minute 66-ah Guirassy chuan he match-a a goal hnihna khungin, minute 79-ah second-half substitute Felix Nmecha chuan Dortmund goal sarihna a thawh ve leh.
Scotland rama an top flight hmahruaitu ni mek Celtic hian an bultanna inkhelah 5-1 laiin debutants Slovan Bratislava sawp mah se Bundesliga club lian lakah an zawr chiang hle a ni.
Tualchhung league lama pangana daih luahtu Dortmund khan Europe bul an tanna inkhelah sithum faiin mualneitu Belgian side Club Brugge an lo sawp tawh bawk.

UEFA Champions League

League Stage Thawhlehni zan result

Red Bull Salzburg 0-4 Brest
Stuttgart 1-1 Sparta Prague
Arsenal 2-0 PSG
Barcelona 5-0 Young Boys
Bayer Leverkusen 1-0 AC Milan
Borussia Dortmund 7-1 Celtic
Inter Milan 4-0 Red Star Belgrade
PSV 1-1 Sporting CP
Slovan Bratislava 0-4 Manchester City