Thawk tha ber 5-na ni thei si hi….

Tun hnaia chief minister-in Intensified IEC Campaign on HIV thawh hnihna leh HIV Test Drive Campaign 2025 a hawnnaah khan, Mizoram chu India rama HIV/AIDS venna leh enkawlna lam thawk tha ber 5-na a nih mek thu report a ni a. Hemi chungchangah hian chief minister pawhin, “Mizoram hi HIV/AIDS inven dan awareness nei tha pawl tak nia tarlan kan ni a. HIV kai kan tam viau lawi si. Awareness nei tha, zawm tha si lo state angin kan lang a. Hmalakna awmze nei, zawm hlawh lehzual awareness kan ngaihtuah chhuah a tul,” tiin a sawi nghe nghe a nih kha.
‘Thawk tha ber 5-na’ tih a rik ruala zawhna lo lut nghal chu, “Engtin nge thawk tha ber 5-na lai ni thei si, India rama HIV/AIDS hluarna ber state kan la nih cheu?” tih hi a ni a. Hei hi tuna kan dinhmun mek nen han khaikhin chuan, ‘thil in-kawl-kalh tak’ a tih theih awm e.
Chu lam chu a enga pawh lo ni se, HIV/AIDS venna leh enkawlna lama kan thawh dan (process & activities) hrim hrim hi chu a langsarin a thawm pawh a ring thin narawh e. Red ribbon football kan ti, quiz kan ti, film tawi kan ti, media hrang hrangah advertisement kan ti, banner, poster, sticker, passenger phur chi lirthei zawng zawngah nen, bazar bag khai nen lam, HIV/AIDS chungchang inziahna hi hawina lam apiangah hmuh tur a awm, a tih theih awm e. Syringe thianghlim sem te, counseling te… tih theih zawng zawng hi chu kan ti vek a ni ber. Chuti chung chuan India ramah HIV/AIDS hluarna ber kan ni a, a hluarna ber kan ni satliah mai lo va, kan hnuai amite nen kan inthlau em em bawk.
Chief minister-in “hmalakna awmze nei, zawm hlawh lehzual awareness…” tiin a sawi a; hma la tha em em si, mahse hluar tulh tulh lawi si kan nih avang hian, “hei aia awmze nei lehzual zawk tur” kan zawn a, kan dap tlan hi a tul ta tihna a ni ber awm e.
A nihna takah chuan, HIV/AIDS chungchanga hriattur pawimawh leh tul zawng zawng hi chu, puitling chin, a tua te mai pawh hian kan hre em em vek tawh, hre reng chunga ti lui, bawhchhe lui kan ni ber a, tihngaihna tak pawh hi a vang ta hle a ni.
Tuna kan hna pui ber tur ni ta chu, tuna naupang thanglian mekte hi, an lo thanlenna kawnga he hri tha lo tak laka an him theihna tura nasa taka hmalak hi a ni; uar (strong) deuh taka sawi dawn chuan, tuna thanglian mekte hian HIV/AIDS an tih a, an hlauh em em theihna tura an thluak suk (Brainwash) hi kan tih theih awm chhun tlemte zinga mi a ni tawh mai awm e.