Belhchian kan dawl em?

Mi pakhat hian, kawng thlang lama tu te emaw paih bawlhhlawh tling khawm video hi social media lamah tun hnai khan a pho lang a. He video post-tu hian a comment zui a; “….hei hi chu khualzinte chuan an rawn hmu hauh lo ang; ama’rawhchu, pa invawng fel tak, inchei tak, bal ru riau si te pawh kan ang…., belhchian kan dawl lo…” tiin.
Tun hnaia Mizoram rawn tlawhtu khualzin tam tak hi chu, Vairam phaizawla khawsa thang, tlangram hring mawi tak leh boruak thiang nuam tak pawh hmu ngai lo, hmun tawp tak taka awm thin te pawh an ni maithei. Mizoram an lo thleng a, hawina lam apiangah tlangram, ramngaw hring mawi em em leh boruak thianghlim tak an rawn hmuin an rawn chen ve a, anni tan chuan hahipa sawi tling a ni. Kawngpui dungah lirtheiin an tlan a, an mithmuh phak chin chu a lo fai viau te pawh a ni thei e. Aizawl khawpui an lo lut a, khawpui chhung laili, hmun fai lai te an rawn hmu a, video-in an la a, social media lamah an vawrh darh chuai chuai a. “Aizawl khawpui chu a faiin a thianghlim, lirthei ‘pawt pawt ri’ pawh hriat tur awm lo, traffic discipline lah a tha, mipui an hawihhawm, India ram ni awm lo tak a ni…” tiin.
Khualzinten min rawn hmuh dan leh min fak dan thenkhat hi chu a dik chin pawh tam tak a awm ang, mahse ‘belhchian kan dawl em?’ tih lai tak hi zawhna pawimawh tak, inenfiahna tur point pawimawh tak chu a ni.
Naupang pawh hi, a dik lohna leh a thil tihsual chipchiar taka phawrhsak a, ‘i chu ti, i kha ti, engati nge?’ tia vin khur khur ai chuan, ‘miin fel an ti viau si che a, he thil hi i tih niawm lo tak a ni…’ tia tha taka hrilh hian, an tihsual sima insiam that an phur phah thin an ti.
Rel kawng lo lut tur hi tunhma khan kan helh thin hle a, ‘inchimralna thlentu tur a ni’ ti hiala rel kawng lo lut tur dodalna thawm te pawh kha a ri deuh laih laih thin a nih kha. Tunah hei a lo lut a, khualzin tam tak an rawn lut hum hum a, mi tam takin eizawnna tha tak an neih phah a, kan ram mawinate khawvelah min puanzar zau sak a, khawvel hriat kan lo hlawh phah ta der mai. A sawrkar ang pawhin, ‘tourism industry’ hmanga state economy chawikan tumin tan kan la ta mup mup mai a nih hi! Chimral kan hlau a nih chuan, chimral kan nih lohna tura tan lo khawh ve mai kha kan tihtur chu niawm tak a ni.
Hetih rual hian, khualzinten min fakna lai chauh en lova, min sawiselna laite leh belhchian kan dawl lohna laite pawh hriat tuma inenfiah a, insiamthat kan tum zel hi hma kan sawnna tur chi niin a lang.