The Voice-ah Adam Levine a kir leh

The Voice-ah Adam Levine a kir leh
Adam Levine chuan The Voice season 27-ah coach thutthleng a rawn luah leh dawn ta. Levine hi The Voice-ah season 16 coach a nih hnuah 2019 khan he show hi a chhuahsan a, tunah Maroon 5 frontman hi a rawn comeback leh dawn ta a ni.
Adam Levine chuan The Voice-a a rawn kir lehna chhan sawiin, “A hun leh tawhin ka hre ve bawk a, mahni duhzawng tiin, chhungte bulah hun tam zawk kan an tal ve a, inngaihtuahna hun tha tak ka nei tawh bawk. Ka inpeih leh tawh a, a lo remchang hlauh bawk a, kan ti leh dawn ta a nih hi,” a ti.
2019-a The Voice a chawlhsan khan a lungleng chuang miah lo ni a sawiin, Behati Prinsloo pasal, fa pathum nei tawh, Adam Levine, kum 45, chuan, “Mak angreng takin ka chawlhsan chung khan ka khua a har miah lo. Mahse, hetia ka kir leh takah chuan ka ngainain min pawt lehnghal em em si a ni,” a ti bawk.
Tun season tharah hian John Legend, Michael Buble leh Kelsea Ballerini te nen an thawkho dawn a, a thawhpui turte chu a ngainat thu sawiin, “Mithar ang pawhin ka inhmu bik lo, chutihrualin eng emawti zawng tak chuan a danglam ve deuh a. Ka hlimin ka phur a, an vai hian ka ngainat sa tak vek an ni,” a ti.
Adam Levine hi The Voice an tih tan atanga coach ni ngar ngar kha a ni a, Blake Shelton, Christina Aguilera, Sakira, Gwen Stefani leh midang te pawh he show-ah hian a lo thawhpui tawh a, tunah chuan he show an tih tan laia coach ni thin chu amah chauh a ni ta.