The Weeknd leh KISS ten 1B view music video nei thar

The Weeknd leh KISS ten 1B view music video nei thar
The Weeknd leh KISS te chuan YouTube-a vawi tluklehdingawn en hlawh thei music video an nei thar a, The Weeknd hian hetiang zat music video en hlawh thei pasarih a nei tling ta a, KISS tan he mellung hi an vawi khat thlenna a ni ve thung.
Canadian dance-pop musician The Weeknd hla hit ‘Blinding Lights’ music video chuan YouTube-ah vawi tluklehdingawn en a hlawh ta a. He hla hi a lar vanglaiin Billboard Hot 100 chart-ah kar li chhung a No.1 thei a. He hla hi a album ‘After Hours’ atanga a lead single a ni. ‘Blinding Lights’ music video-ah hian The Weeknd-a’n a blazer sen nena Las Vegas a fang kual lai vel tarlan a ni.
The Weeknd, a hming tak Abel Tesfaye hian a hla dang ‘Starboy’ featuring Daft Punk, ‘Save Your Tears,’ leh ‘The Hills’ music video te pawh he mellung hi a lo thlenpui tawh a ni.
KISS pawhin a vawi khat nan YouTube-a vawi tluklehdingawn en hlawh thei music video an nei ta a, a hla “I Was Made for Lovin’ You” music video chuan he mellung hi a thleng ve ta. An music video hi 1979-a an siam daih tawh kha a ni nain, YouTube-ah hian 2020 khan an dah lut ve chauh a, an signature sang dum leh var, makeup leh an thuam famkim inbelin, rock vanglaia an chezia kha tarlan a ni.
“I Was Made for Lovin’ You” hi a lar vanglaiin Billboard Hot 100-ah No.11 a kai a, ‘Dynasty’ album atanga an single niin, a album hian Billboard 200 (US albums) chart-ah No.9 a kai thei bawk.