Theih loh anga ngaih hi a lo theih \hin…

Zokhawsanga Assam Rifles te an insawnna tura Assam Rifles leh Mizoram sawrkarin inremna an lo ziah tawh tihhlawhtlinna programme chu Union Home Minister Amit Shah chuan Aizawl hmunah ngei a rawn hmanpui a. “He hmalakna hi Assam Rifles Camp sawnna a ni satliah lo va, Aizawl duhawm zawk a awm theih nana hmalakna a ni a; Mizoram mipuite ka lawmpui a, tangkai taka in hman ka duhsak che u a ni,” tiin a sawi a.
Khawpui laili atanga sipai sawn chhuahna tur hian sawrkar kal tate khan hma an lo la thin a, a chang chuan beidawn ram ram chang a awm a niang, khawpui atanga sipai sawnchhuah a harsat thute pawh ram hruaitu lu ber berte pawhin an sawi thin a nih kha.
Thil theih loh nia ngaih te pawh hi, beih ngar ngar chuan a tawpah a lo theih leh nge nge thin tih tuna Assam Rifles sawn chhuah a han ni ta hian a nemnghet, a tih theih awm e.
Lengpui Airport chungchang pawh hi, ‘state rethei, leiba ngah si, thawhchhuah nei mang si lo tan chuan enkawl a hautak ta deuh e’ tiin retheihna denchhenin midang kuta hlan dan tur ngaihtuah mek a ni a. He thilah hian, a sawrkar lam leh a mipui lam pawhin airport enkawl hautak dan hre reng chungin, ‘state sawrkar hian enkawl zel rawh se’ tih ngawt aiin, ‘IAF ai chuan AAI hian enkawl zawk se’ tih chu duh dan tlanglawn zawk niin a lang ta a. Hemi chungchang hi Union Home Minister hnenah pawh sawrkar leh pawl hrang hrangin an lo thlen ta ngei a. Hma lam hun chu sawi lawk thei a ni lo na a, AAI enkawl tura hmalakna kawngah Union Home Minister pawhin hma min lakpui a inhuam hle niin a lang a. ‘State-in kan enkawl thei ta lo e, AAI hian min enkawl sak rawh se’ tih chu Mizoram duh dan ni ta berin a lang.
‘India rama state enkawl airport awm chhun’ tih hi ‘India rama state enkawl international airport awm chhun’ tia sawi zui tura enkawl chhoh zel theih chu tu te pawhin kan duh vek ngei ang. IAF kuta awm ai chuan AAI kuta kan awm hian ‘international airport’-a hlankai theihna chance a zau zawk dawn niin a lang.
Theih loh anga sawi thin, khawpui chhung atanga sipai sawn chhuah pawh a theih hun a awm ang hian, Lengpui Airport pawh hi engtikah emaw chuan ‘international airport’ hming a put theih hun hi a la thleng ngeiin a rinawm.