Theihtawp chhuah a ngai: Arini

Zaithiam lar a ni a, rimawi khawvelah a hming hre lo an awm lo ang tih tur khawp a ni. Kohhran huangah ani aia sawm hlawh an awm bik lo ang. A zai mawlh mawlh a ni ber a, hetianga zaia rawngbawl tur hian theihtawp chhuah a ngaih thu a sawi.
Arini a ni a, dam lo ve thei, chau ve thei a ni. Nuamsam lo chunga mipui hmaa inlan a ngaih chang a awm a, chau chung chunga a zai chang a awm. “Theihtawp chhuah a ngai, insan mar a ngai ve thin,” a ti.
Inpeih lo chunga zai a ngaih chang a awm thu a sawi a, “Dam lo chunga zai a ngaih chang a awm a, chauh tak chunga zai chang te pawh a awm. Taksa nawm lohna bakah rilru lamah pawh harsatna tawh chang a awm a, inpeih lo deuh chunga zai a ngaih chang a awm ve thin. Mahse theihtawp chhuah a ngai a, pal luih a ngai ve thin,” a ti.
“Chutianga inpeih loh chang chuan mahni leh mahni infuih te pawh a ngai ve a. Rawngbawlna a ni a, ka tih a ni lo a, ka thiam vanga min sawm an ni lo a, Pathian khawngaihna liau liau a ni tiin keimah leh keimah ka inhrilh thin,” tiin theihtawp a chhuah dan a sawi.
“A mood-a awm theih loh tum te pawh a awm a, ro riau tum te pawh a awm. Natna chungchangah phei chuan, rawngbawlna aia natna lo hmuh len zawk te hi a awl a, chuvangin tih hram hram a ngai a, chutiangah chuan khawngaih rawngbawlna a ni tih ka inhrilh thin,” a ti.
Arini hian ni tin Bible a chhiar a, Bible chhiar leh tawngtaiin ni tin hun a hmang thin. Chutah pawh chuan theihtawp chhuah a ngaih thu leh tih hram hram a ngaih thu a sawi a, “Mutchhuak chung chunga tih a ngaih chang a awm a, peih lo riau tum te pawh a awm. Bible chhiar leh tawngtaiah hian tih hram hram a ngai a, theihtawp chhuah a ngai,” a ti.