Thenawm Manipur-ah tri-nation tournament

Thenawm Manipur-ah tri-nation tournament
Indian football-a thawhhlawk kumkhua Manipur chuan nimin atang khan ram pathum inelna Tri-Nation International Football Tournament 2023 a thleng a, Imphal-a Khuman Lampak Stadium-ah India, Kyrgyzstan leh Myanmar-te’n 2023 Asian Cup inbuatsaihna tournament an khel mek.
Manipuri hi Indian football supply line lian berte zinga pakhat niin, international tournament thlen hi an phu hle niin Indian media-te’n an tarlang.
Bengaluru FC tana Indian Super League final a khelh hnuah harhvang zawkin India captain Sunil Chhetri chuan national team a zawm a, an game hnuhnung 11-a vawikua tehreng tlawm tling Blue Tigers tlarhma lamah a kirleh.
March 22-28, 2023 chhunga khelh zawh tura ruahman ‘Hero Tri-Nation International Football Friendly’ tournament bultanna nizan dar 6-a khelh result tarlan hman lohah Fifa world ranking-a 106-na India leh an aia ranking hniam Myanmar (ranked 159) intumin, Inrinni zan dar 6 hian he tournament-a ran-king nei sang ber Kyrgyz Republic (94) leh Myanmar an intum ang a; March ni 28, karleh Thawhlehni zan dar 6-ah bawk a thlengtu ram leh Kyrgyz Republic hian tournament hmawr an bawk tawh ang.
Tournament khelhna Khuman Lampak Stadium hian Indian football-ah hnuhma hraw lo nei tawhin, kum engngemawzat chhung chu Hero I-League game khelhna’na hman a lo ni tawh a, kum 2022 August thla mai pawh khan India rama tournament ngaihhlut hlawh Durand Cup a lo thleng tawh bawk.
He stadium hian chanchin lungchhiatthlak lam pawh sawi tur neuh neuh neiin, a sak laia a chim avanga chhiatna a thlen hnuah a satu contractor-te chuan helho kut an tuar nia sawi thawm pawh a lo awm tawh a ni!
Tuntum tri-nation tournament inkhelte hi Sony sports network leh Disney + Hotstar lamah live-a en theiha chhawpchhuah a ni.
Tarlan tawh thin angin, Imphal khawpuia match hnihte hi nakum January ni 1 atanga Qatar rama khelh tan tur 2023 AFC Asian Cup atana Indian team inbuatsaihna a ni.
Nizan hma zawnga Indian men’s football team chetchhuah hnuhnun ber chu nikum September thla international friendly-a sithum faia Vietnam an hneh loh kha a ni.
India head coach Igor Stimac chuan ni sarih chhung awh tur tournament khel tur hian squad-ah player 23 koin, reserve-ah 10 a dah a; squad-a Mizo player awmchhun chu ISL khelh zawh taka best player-a thlan Lallianzuala Chhangte chauh kha a ni.
Bengaluru FC ace Chhetri leh Lunglei midfielder bakah senior goalkeeper Gurpreet Singh Sandhu, defender Sandesh Jhingan leh midfielder Jeakson Singh-te hmuh tur an awm bawk.
Pathianni khan ATK Mohun Bagan tana Indian Super League (ISL) 2022-23 title la hlimhlawt defender Pritam Kotal leh forward Naorem Mahesh Singh-te chu hliam avanga inhnukdawk pahnih Sivasakthi Narayanan leh Glan Martins-te hmunruak luah turin Kolkata-a inkulh India camp zawm tura koh an ni.
Tarlan tak angin, football atchilh state Manipur hian Indian football-ah kumkhaw tlaitluanin a lo thawhhlawk tawh thin a, he state-ah hian Blue Tigers player-te pawhin kum tamtak domestic tournament an lo khel tawh thin a, mahse, international tourna-ment tak erawh Manipur-in a thlen vawikhatna a ni.
India defender Chinglensana Konsham chuan tournament tan hma lawk khan an state khawpuia tournament khel turte a lo ‘welcome’ em em tih sawi chungin, “Imphal-a tri-nation nghah a nih tur thu puan a nih hnu khan kan veng lam atangin call leh message ka dawng nasa mai,” a ti.
Meitei tlangval Chinglensana hian an state-a international tournament an nghah chhan niawma a rin dan sawiin, “India top player lo ni tawh Renedy Singh leh Gouramangi Singh-te kha national level-ah pawh role model nih tling an ni a, kan state atanga India player thar chhuak zelte pawh hi anni huhang leh sulhnu chhuina a ni.
“National team-a Renedy bhai leh Mangi (Gouramangi) bhai inkhel thlir chunga seilian kan ni a, kei ngei pawh hi naupang ka nih lai atanga idol-a Mangi bhai vuan tlattu ka ni a, a inkhel ka en atangin defending khelh dan tam tak ka zirchhuak a, anni chawimawina hun a ni,” a ti.
India midfielder Suresh Wangjam pawhin Manipur mite thinlunga football a bei ngheh tlat thu sawi chungin he game lo pawh sport hrim hrim tuipui state an nih thu heti hian a sawichhuak ve bawk:
“Football chauh a ni lo e. Manipur mite hian infiamna chi hrang hrang – boxing, badminton, hockey, weightlifting leh a dang tam tak kan ngaina,” tiin Mary Kom leh Mirabai Chanu ang tur tam tak an neih thu a tarlang tel.
Kum 22 mi chuan Imphal khuaa tri-nation nghah a nih tur thu puan a nih ruala an chhungkaw member zawng zawng an phur em em thu leh an kawtkai ngeia India tana a khel lai a chhungte’n an hmu tur chu a tan pawh a ‘special’ hle niin a sawi.
He stadium-a I-League match a khel lai chu a chhungte’n thlir fo tawh mah se tuna mi hi chu a dan a dang tih sawi chungin a chhungte tam takin ticket an dil sup sup tih nui chungin a sawi a, chu chu Manipur-te ang football atchilh state-ah chuan thil nihphung pangngai ve reng niin a sawi bawk.
Nikuma Khuman Lampak stadium-a Chennaiyin FC tana Durand Cup khel India central midfielder Anirudh Thapa pawhin Imphal-a tournament an khel tur a phurzia thu sawichhuak ve bawkin, “Khuman Lampak-a inkhelh hi experience pui tak a ni a, khelmuala mipuiin team an lo auphur thinte kha a ngaihnawmin, a hmuhnawm a; tuntum phei hi chuan team tan tura mipui tam zawk an lo chhuahkhawm ngei ka beisei a, Imphal mipuite thlawpna thawm ring tak nen kan inkhel khawp ang,” a ti.

India national football team squad

Goalkeepers: Gurpreet Singh Sandhu, Phurba Lachenpa Tempa, Amrinder Singh, Vishal Kaith (reserve), Prabhsukhan Gill (reserve)

Defenders: Sandesh Jhingan, Roshan Singh, Anwar Ali, Akash Mishra, Chinglensana Konsham, Rahul Bheke, Mehtab Singh, Pritam Kotal, Subhasish Bose (reserve), Asish Rai (reserve), Narender Gahlot (reserve)

Midfielders: Suresh Wangjam, Rohit Kumar, Anirudh Thapa, Brandon Fernandes, Yasir Mohammad, Ritwik Das, Jeakson Singh, Lallianzuala Chhangte, Bipin Singh, Liston Colaco (reserve), Nikhil Poojary (reserve), Sahal Abdul Samad (reserve)

Forwards: Manvir Singh, Sunil Chhetri, Naorem Mahesh Singh, Ishan Pandita (reserve)

Head Coach: Igor Stimac