Thiamber lawmman dawn zana Isua hming lamtu Lallianzuala Chhangte

Thiamber lawmman dawn zana Isua hming lamtu
Lallianzuala Chhangte
Kum zawna All India Football Federation (AIFF) Men’s Player of the Year 2023-24 chawimawina dawngtu Lunglei Zohnuai tlangval Lallianzuala Chhangte chu karliamta Zirtawpni zan New Delhi-a AIFF 2024 Awards sem inkhawmah inlan thei lo mah se video message thawnin, a zui Isua Krista hming a lamchhuak a, a Lal leh chhandamtu hruaina, venhimna leh malsawmna a dawnah lawmthu a sawi.
Zirtawpni zana AIFF annual awards ceremony-ah LZ-a thusawi chhuahin, chu video-ah chuan, “He award ka dawng hi ka tan chawimawina a ni a, a hmunah awm thei lo mah ila Hon’ble Sports Minister sir hnena ka lawmthu hi uar takin ka rawn thawn e.
“He chawimawina hlu tak dawn hi phu lo hlein inhre mah ila ka dawng thei hi ka lawm takzet a ni. Zanin hian Pathian chungah lawmthu ka sawi a, ka Lalpa leh ka chhandamtu Isua Krista min hruaina, venhimna leh malsawmna avangin ka lawm a ni. He dinhmun ka Iuah theihna chhan a ni.
“A dawtah chuan ka football zinkawng bultan phat atanga min thlawptu lian ber ka chhungte chungah lawmthu ka sawi a; Mumbai City FC-a ka thian leh chhungte bakah national team-a ka unaute chungah ka lawm bawk a; ka han lamchhuahte puihna tel lo chuan ka tan he award hi dawn mi rual a ni lo,” a ti.
Thla hmasa mai June-a kum 27 pum fel LZ-a lawmpuina leh chawimawina’n Lunglei lamah chuan kawng dungah a thlalak chuanna banner tar a ni a, lawmpuina leh chawimawina hun engtianga buatsaih tum nge a nih hriat theih a ni rih lo.
Lallianzuala Chhangte hian nikum khan he chawimawina hi a lo dawng tawh a, Mizo player zingah Jeje Lalpekhlua’n a lo dawng ve tawh bawk.
Mizo footballer Zuala hi tum khat aia tam he award dawng thei pangana niin, Mizo zinga vawihnih dawng thei hmasaber leh tunhnaia international football chawlhsan ta Sunil Chhetri tih loha he chawimawina a zawna dawng thei awmchhun a ni ta bawk.
India captain hlui Bhaichung Bhutia pawh khan he chawimawina hi vawihnih dawng ve tawh bawk mah se a zawnin a dawng lo. Indian legend IM Vijayan khan vawithum dawngin, dawng hnem ber Chhetri kutah award vawisarih a lut a, LZ-a hian vawi engzat tak dawng thei ang maw?
Indian footballer ropui zinga chhiar tel Zuala hian kum 2012/13 vela matric a pass hlim khan inkhelh zir turin DSK Shivajians a zawm a, kum 12 vel a liam meuh chuan AIFF Best Player nihna a dawng zawn ta thawt mai!
Thla hmasa mai khan India rama professional football rual intelkhawmna pawl FPAI kut atangin Indian Player of the year award 2024 chawimawina a dawng a, Indian top flight chawimawina lian Indian Super League (ISL) Best Player ni tawh bawkin, Durand Cup top scorer hial a lo ni ta bawk a, India rama footballer chawimawina awm thei chu a dawng kim thawkhat viau tawh a ni!
Lza hian chawimawina a dawn tawh zinga a ngaihhlut ber chu ISL best player award kha a nih thu a lo sawichhuak tawh a, ISL chu foreigner tha tak tak awmna a nih avangin chutiang kara award a dawng thei chu a ngaihlu lo thei lo niin a sawi.
Chhangte pa hian season liamta khan inelna hrang hrangah Islanders tan goal 11 khungin assist vawisarih a siamchhuak tling bawk a, Indian Super League season hnuhnung pahnihah goal 10 a khung tling ve ve a ni.
Mumbai City FC kuta 2023-24 season ISL Cup a luh theihna kawngah Mizo forward hian a thawhhlawk a, AFC Champions League lamah pawh Islanders tan game ruk a khel tling bawk.
Club level-a a hlawhtlinna piahlamah LZ-a hi India national team tan pawh player pawimawh a ni a, thla hmasa mai June thla FIFA World Cup Qualifiers-a Doha khawpuia mualneitu Qatar an luhkhung tum pawh khan ram tan goal a khung a; November 2023-a Arab team dang Kuwait an khelh tuma Manvir Singh-a goal pawh kha a siamchhuah a ni a; captain Sunil Chhetri chawlh hnu phei hi chuan tlarhma lama Blue Tigers innghahna lian a ni chho dawn niin a lang.
Tunhnai khan a khelh mekna Mumbai City FC pawhin sum hraw tak hlawh turin Mizo star contract neih lai an pawhseisak a, kum 2026/27 season thleng an chhawr zui dawn a ni.
Vairengte tlangval Hlana a sang
Tuntum AIFF Awards sem inkhawmah Mizo player dang striker David Lalhlansanga chu AIFF Promising Men’s Player of the Year atan thlan niin, Vairengte tlangval kum 22 mi hian season liamta khan Mohammedan Sporting tan belhkhawmin I-League, Calcutta Football League (CFL) leh Durand Cup-ah goal 34 tehreng a thun tling a, Kolkata club chu I-League leh Calcutta Football League title a lakpui nghe nghe.
Lalhlansanga hi CFL leh khawvela football tournament upa ber pawl ni pha Durand Cup-ah hian top scorer a ni ve ve a, kumin May thla khan a career-a a vawikhatna atan FIFA World Cup Qualifiers atana inbuatsaih national team zawm tura kohna a dawng ta hial a, tunah AIFF Emerging Player of the Year award a dawng zui ta a ni.
Kolkata club tan David-a hian season liamta khan Durand Cup leh I-League lamah belhkhawmin goal 11 a thun a, assist vawithum a siamchhuak bawk.
A goal ruk tun hmangin Durand Cup top scorer a ni a, Calcutta Football League lamah phei chuan goal 21 zet puitlinin, Mohammedan SC chanchina a vawikhatna atan I-League title a lakpui hial a ni.
Club tan a cheropui bawk a, Kolkata club lian zawk leh Indian top flight-a inlan mek East Bengal FC chuan tun nipui insuan hun lai hian hun rei zawk an kianga khel turin contract an ziahpui a, season tharah hian a career-ah bung thar a chuangkai dawn ta a ni.
Kolasib District Football Association chuan Kolasib district atanga he chawimawina lawmman dawng thei hmasa ber a nihna zawnah an district tlangval an chhuang takzet tih thuchhuah siamin an tarlang a, a kal zelna turah sang tak thleng turin duhsakna an hlan nghal.
Coach tha ber Khalid Jamil
Aizawl FC head coach hlui Khalid Jamil kha AIFF’s Men’s Coach of the Year atan thlan ni ve bawkin, Jamshedpur FC head coach ni mek hi tunah kum 47 mi niin, season liamta laihawlah khan Men of Steel hi enkawl tan chauh mah se Kalinga Super Cup semi-final a luhpui a, he competition-a an la thlensan ber tum a ni.
A leadership hnuaiah Jamshedpur chu ISL tawp lamah an rawn chetha chho a, team a enkawl hnu league-ah tlawm nei loin match nga chhung a kalpui tling bawk.
Tunhnai lawk khan Jamil hian kum hnih dang Jamshedpur FC enkawl chhunzawm turin contract thar a ziak a, Indian top flight ISL-a India mi head coach awmchhun a ni mek.
AIFF Women’s Coach of the Year award dawngtu chu Sukla Dutta ni ve thungin, Bangladesh rama khelh zawh takah khan Dutta hian India chu SAFF U19 Women’s Championship title a lakpui a; Sreebhumi FC head coach a nihna zawnah a club enkawl chu Indian Women’s League 2 (IWL2) bul tan kumah a champion-pui a, season tharah Indian Women’s League (IWL) a khelhpui dawn a ni.
Women’s Player of the Year Indumathi
Tamil Nadu hmeichhiate zinga AIFF Women’s Player of the Year award dawng hmasaber ni turin IWL season liamtaa Best Midfielder award dawngtu Indumathi Kathiresan thlan a ni.
Odisha FC tan goal nga khunga 2023-24 Indian Women’s League title latu Indumathi hi kum 30 mi ni tawh mah se Indian national team tan pawh player pawimawh a la ni pha a, kumin February thla khan Turkish Women’s Cup-a Estonia an hmachhawn tumin goal a tilut nghe nghe.
Kan han tarlan takte bakah hian Sukla Dutta (Best Women’s Coach), Neha (Promising Women’s Player), Ramachandran Venkatesh (Best Referee) leh Ujjal Halder (Best Assistant Referee)-te chu mimal lawmman dawngtu dangte an ni.
Sports Minister Mansukh Mandaviya, Parliamentary Affairs Minister Kiren Rijiju, Olympic medallist Yogeshwar Dutt, India Davis Cup captain Rohit Rajpal leh Indian sport-a mi langsar tak tak dangin he award ceremony hi an hmanpui.
AIFF lamah president Kalyan Chaubey, vice President NA Haris, treasurer Kipa Ajay leh acting secretary general M. Satyanarayan bakah executive committee member-te leh state association hrang hranga senior official-te an tel bawk.

AIFF 2024 Award 2023-24 dawngtute

Men’s Player of the Year: Lallianzuala Chhangte
Women’s Player of the Year: Indumathi Kathiresan
Promising Men’s Player of the Year: David Lalhlansanga
Promising Women’s Player of the Year: Neha
Men’s Coach of the Year: Khalid Jamil
Women’s Coach of the Year: Sukla Dutta
Referee of the Year: Ramachandran Venkatesh
Assistant Referee of the Year: Ujjal Halder
Most Successful MA (Club Competitions): Indian Football Association (West Bengal)
Most Successful MA (NFC Competitions): All Manipur Football Association
Best MA – Supporting Women’s Football: Punjab Football Association
Best MA for hosting most AIFF competitions: Football Association of Odisha and Goa Football Association
MA with most player registrations (men’s): Kerala Football Association
MA with most player registrations (women’s): Western India Football Association (Maharashtra)
Special Award for MA launching new projects: Gujarat State Football Association
MA with most Grassroots activities: Gujarat State Football Association
MA with most Youth tournaments conducted: Karnataka State Football Association
MA with most Coaching courses: Punjab Football Association
MA with most Refereeing courses: Gujarat State Football Association

Special awards:

Government of Arunachal Pradesh and Arunachal Pradesh Football Association: For hosting the Santosh Trophy Final Round
Government of Odisha and Football Association of Odisha: For hosting FIFA World Cup Qualifiers, Intercontinental Cup, Kalinga Super Cup, Senior Women’s NFC Group Stage, Junior Boys’ and Girls’ NFC Tier 1 and Sub-Junior Youth League
Jammu and Kashmir Sports Council: For twice hosting the India U17 men’s national team camp and upgrading the infrastructure of the TRC Ground

India rama football hmasawnna atana thawhhlawk bikte tana pek award dawngtute:

Football Sports Development Limited
Nivia
Ministry of Youth Affairs and Sports
IndiGo
Sports Authority of India
Performax