Thik tur nge thik loh tur?

Duh deuh mai i tawng a, a lo duh ve che a, in in mil phian lehnghal. Tichuan, hmangaih i tawng ta niin i inhria a. Mahse, engin emawni i rilru a tibuai tlat, mipa/hmeichhe dang chanchin a sawiin- a college kalpui te an ni emaw, a hnathawhpui te an ni emaw, a thian hlui te emaw, te chanchin a sawi chhuah apiangin i thinrim deuh tlat a, nuam lo i ti thin, zep tur a awm lo, i thik a ni!
Thikna hi mihring nihphung pakhat a ni ve a, thinrimna te nen. Mahse, kan thikthu chhiat dan a zirin kan inkar a chhiat phah thei a, kan duh loh thleng thlengin min kal tir thei tlat a ni.
Kan ngaihzawng te lakah thikthu kan tilang a nih pawhin thil nihphung lo a ni chuang lo, mahse, kan thikthu tihlan dan hi a pawimawh lai chu a ni. Kan kawppui ten midang an melh deuh vang vang ni a kan hriat chuan keimahniah nuam lo tihna a rawn awm nghal a, chutah chuan kan kawppui te hum tumin hma kan la ta thin a ni.
Kan kawppui laka kan thikthu tihlan hi a pawi hauh lo, midangin an lo chhaih a, an lo kheuh deuh a nih pawhin kan thikthu chu kan tilang thiang a lawm. Thik miah lo angin awm ta ila, thenkhat chu an lawm lo zawk hial thei a, mahse, kan thikthu kan tihlan dan chu a pawimawh ta ber zawk chu a ni.
Thikthu tihchhiat lutuk chu mahni inringtawk lo anga ngaih mai pawh kan awl leh hlauh thei a, thikthu tihlan miah loh chu kan duhtawk lo tihnaah emaw an lo ngai leh thei bawk. Heti lai kar hi awm thiam a ngai hle a ni.