Thil dik kan tihna tura min dodaltute dim kan tum lo – Chief minister

Sawrkar kalphung an duan tinrengah kalphung tha zawk an duang chho zel a, thil dik kan tihna tura min dodaltute dim an tum loa, thil dik lo siamtha tura dawrtute lakah erawh an inhawng zau hle tih chief minister Lalduhoma chuan a sawi.
Thawhtanni khan chief minister hian department pahnih – Disaster Management & Rehabilitation (DM&R) leh Department of Personnel & Administrative Reforms (DP&AR) an hnathawh a thlirlet pui a. Heng department changtu minister K Sapdanga, adviser to CM (Planning & Finance) TBC Lalvenchhunga, commissioner & secretary to CM Vanlaldina Fanai bakah Finance leh Planning department official-te an tel.
Aikal lak an titawp a, lo la awm ru palh an awm em tih an enthla zel tih chief minister hian sawiin, officer pension tawhten sawrkar facility an lo la kawl reng em, tih pawh an dap zel tih a sawi.
Hun vawn dik kawngah khauh zawkin an kal a, sawrkar hnathawkten an zawm tha tlang hle a, an kengkawh zui zel dawn tih a sawi. Sawrkar hnathawkte chu mipui tana dawr theihna hun tam zawk nei tur leh dawr nuam zawk ni turin an beisei tih a sawi a ni.
Service Review Committee din vek turin department tin an ti a. Sawrkar hnathawk, an hnaa chhawr tlak si loh dap chhuak a, special pension scheme tha tak nena chawlhtir a, an aia midang tha zawk, chhawr tlak ngei lak tha an ti tih Lalduhoma hian a sawi. e-office uar chhoh zel an duh a, a theih chin chinah ngaihven tlang tura chahin, officer-ten an hnuaia thawk an staff-te welfare ngaipawimawh turin a chah.
Agreement tha tak nen chauh contract hna pek tawh tur a ni tih sawiin, “Contractor lam chan tha sa ranin agreement kan ziak fo a. A phenah thil rinhlelhawm tak a lo awm duh viau lehnghal. A neitu, sum tumtu sawrkar hi a dawih zawkah kan tang foa, hrem chakawm tak tak pawh kan hrem ngam loh phah. Hei hi tihtawp kan duh,” a ti.
Chak zawka hna an thawh theihnan Mizoram PWD Manual an duang mek a, bungrua pawh factory-a lei phalna thlenga neih an duh, tiin, hei hian bungraw lakkhawm dan kalkawng thui lutuk leh muang lutuk thin a tihziaawm an beisei tih a sawi a ni.
“Kan thiltih tinreng hian moral reformation a kengtel a, kalphung tha zawk kan duang chho zel. Thil dik kan tihna tura min dodaltute dim kan tum loa, thil dik lo siam tha tura min dawrtute lakah erawh kan inhawng zau hle,” chief minister hian a ti.
DM&R leh DP&AR minister pawhin thu sawiin, nikum kumtir atangin leilung chhiatna chi hrang hrangin Mizoram a chim a, hna hmanhmawh thlak a nih thin avangin an fund neih ang angin an umzui bawrh bawrh a, a hnu lama lehkha chinfel ngai pawh an ngah a, vawiin thlengin an la umzui zel tih a sawi. DP&AR chu sawrkar marphu lai tak ni ah an inngai a, kalphung thar atana hmanraw pawimawh lai ber an ni, tiin, “Kan kal dan turah pawh thurawn tha dawng turin kan inhawng zau hle a ni,” a ti.
DM&R minister sawi danin, nikuma leilung chhiatna vanga umzui ngai hna hrang hrang chu State Disaster Response Fund hmangin recovery & reconstruction hna, first phase-ah hna 35, cheng nuai 297.92 senna tur an thawk tan dawn a; hna hi tan mai theihin an inpeih tawh. Second phase atan hna chi 125, nuai 634.15 senna tur an thehlut tawh a, third phase-a thawh tur hna 46, nuai 249.40 senna tur proposal dang an duang bawk. Recovery & reconstruction an tih hi kum danga la awm ngai lo, tun sawrkarin a tih thar a ni. Hnathawh tur hi District Disaster Management Authority hrang hrang atanga dawn an ni.
SDRF (2024- 2025) atangin nikum khan African Swine Fever tuartute chhawmdawlna atan cheng nuai 480 chheh hran a ni.
‘Mipui Aw’ online kaltlangin lungawilohna 378 dawn a ni tawh a, 319 chu chin felsak an ni. The Mizoram Right to Public Services Act hnuaia service pek chhuah zat chu 144 atangin 197 a tihpun a ni a, hei hi CM’s 100 points programme a tel a ni. DP&AR (GG&TW) chuan nakum financial year ralhmaa service 300 tala tihpun dan dap an tum.
Chief minister thusawi dang:
8 Department tinin kan dinhmun, kan pending project, leiba, hna kal meka kan thlen chin kan hriatchian a ngai. A bikin 2nd instalment nei chi hna kan thawh phei chu muangchan loh kan duh. Utilization certificate thehluh ran a tul thin a, innghahkhawm a ngai thin bawk. Muang fal bik tumah awm lo se, hmasawnna hna thawk thuai thuai ila kan duh.
8 Department-ten project inang tak tak an thehlut thin a. Hetianga inhretawn loa hma kan lak hian sum leh pai, hun leh tha tul loah a luangral thei. Chuvangin kan project siam reng reng Planning department lama thehluh hmasak zel tur a ni. Anni’n an zirchian hnuah chauh project kalpui thin tur a ni.
8 GST registration nei lo hnenah eng contract hna mah pek loh tur a ni. Contract diltu chuan GST registration an nei ngei tur a ni. Contract hna atangin chhiah tam tak a hmuh theih a, chan kan phal lo.
8 Integrity Pact ngaipawimawh turin department zawng zawng ka chah thar a, hei hian induhsakna dik lo, unau leh laichinte dik lo taka duhsakna a veng a ni.
8 Corporate social responsibility kan dil chu CSR Cell-in hriatpui zel se kan ti a. Project inchhuhsak tumna a ni lo, mumal lehzuala kalna tur zawk a ni.
8 One department one bank system kalpui a thain kan hria a, hriattirna rawn tihchhuah thuai kan tum.
8 Kan sawrkar hnua kan kutthlakte a tha tur a ni.